Ziyafət Əsgərov: Azərbaycan Konstitusiyası dövlət quruculuğunda və ərazi bütövlüyünün təminində mühüm rol oynayıb
Bakı, 24 aprel, AZƏRTAC
Bu gün Azərbaycan suveren və müstəqil dövlət olaraq, regionun ən inkişaf etmiş, iqtisadi və siyasi baxımdan lider ölkəsidir. Təbii ki, bu dövlətin inkişafında, ərazilərimizin işğaldan azad olunmasında və məsələlərin hüquqi müstəvidə həllində Azərbaycan Konstitusiyası olduqca mühüm əhəmiyyətə malikdir.
AZƏRTAC xəbər verir ki, bunu Milli Məclisin sədr müavini Ziyafət Əsgərov parlamentin Hüquq siyasəti və dövlət quruculuğu komitəsinin keçirdiyi “Ümummilli Lider Heydər Əliyev - müstəqil Azərbaycan Konstitusiyasının müəllifidir” mövzusunda elmi-praktik konfransda deyib.
O qeyd edib ki, Azərbaycan təxminən 30 il ərzində işğal altında olan ərazilərinin sülh yolu ilə azad olunması üçün Ermənistana və beynəlxalq təşkilatlara dəfələrlə müraciətlər edib. Lakin tarix sübut etdi ki, nə qədər müraciət olunsa da, bugünkü dünyanın reallıqları fərqlidir.
“Çox təəssüf edirəm ki, bu gün dünyada hüququn gücü deyil, gücün hüququ hökm sürür. Biz nə qədər beynəlxalq hüquqdan danışsaq da, təəssüf ki, beynəlxalq hüquq faktiki olaraq güc hüququna çevrilib. Birləşmiş Millətlər Təşkilatının qəbul etdiyi sənədlər, onun Nizamnaməsi, ölkələrin ərazi bütövlüyü, bir-birinin daxili işlərinə qarışmamaq prinsipləri – bütün bunlar, əlbəttə, gözəl prinsiplərdir. Lakin təəssüf ki, biz bu sənədlərdən faydalana bilmədik. BMT-nin üzvü olmağımıza və həmin sənədlərin həm bizə, həm də Ermənistana aid olmasına baxmayaraq, bu 30 il ərzində nə BMT Təhlükəsizlik Şurası, nə ATƏT-in Minsk qrupu, nə Avropa Şurası, nə də Avropa İttifaqı məsələnin həlli üçün ciddi heç bir cəhd göstərmədi. Əslində, bu qurumlar münaqişənin və müharibənin uzanmasında maraqlı tərəf kimi çıxış etdilər”, - deyə sədr müavini vurğulayıb.
Bölmənin digər xəbərləri
