SİYASƏT
Andreas Rayxhardt: Azərbaycanda iqtisadiyyatın şaxələndirilməsi istiqamətində həyata keçirilən tədbirlər təqdirəlayiqdir VİDEO
Bakı, 21 fevral, AZƏRTAC
Fevralın 21-də Milli Məclisin əmək və sosial siyasət komitəsinin sədri Hadi Rəcəbli Avstriya Respublikasının Federal Nəqliyyat, İnnovasiya və Texnologiya Nazirliyinin baş katibi Andreas Rayxhardtın başçılıq etdiyi nümayəndə heyəti ilə görüşüb.
AZƏRTAC xəbər verir ki, komitə sədri Azərbaycanla Avstriya arasında əlaqələrin yüksələn xətlə inkişaf etdiyini söyləyib. O, ölkələrimizin ərazi və əhali sayı baxımından oxşar olduğunu deyib.
Hadi Rəcəbli son illər ölkəmizdə turizmin dinamik inkişaf etdiyini bildirib, bu sahəyə olan dövlət dəstəyini diqqətə çatdırıb. Bildirilib ki, bu istiqamətdə müasir standartlara cavab verən infrastruktur yaradılıb, o cümlədən otel şəbəkələri qurulub, yollar salınıb, müalicə zonaları fəaliyyət göstərir, “ASAN Viza” sistemi tətbiq edilir. Ən əsası isə sabitlik və təhlükəsizlik şəraiti mövcuddur. Təqdirəlayiq haldır ki, 2010-2017-ci illər arasında Azərbaycana səyahətə gələn turistlərin sayında 40 faiz artım müşahidə olunub.
Söhbət zamanı ölkəmizdə 2015-ci, 2016-cı və 2017-ci illərdə keçirilən bir sıra beynəlxalq əhəmiyyətli tədbirlərdən danışılıb. Qonaqlara qədim tariximiz, zəngin mədəniyyətimiz haqqında məlumat verilib. Azərbaycanın TAP və TANAP kimi önəmli qaz layihələrinin həyata keçirilməsində fəal iştirakından bəhs edilib. Bakı-Tbilisi-Qars dəmir yolu xəttinin əhəmiyyəti barədə söhbət açılıb. Qeyd edilib ki, Asiya ilə Avropanı bir-birinə birləşdirən bu layihə qədim İpək Yolunun bərpasına xidmət edəcək.
Diqqətə çatdırılıb ki, ölkələrimiz arasında müxtəlif istiqamətlərdə, o cümlədən əmək və sosial siyasət sahəsində əməkdaşlıq barədə bir sıra sənədlər imzalanıb. Hökumətlərarası Komissiya səmərəli fəaliyyət göstərir. Dövlətlərarası ticarət dövriyyəsinin göstəriciləri yüksək səviyyədədir.
Avstriya Federal Nəqliyyat, İnnovasiya və Texnologiya Nazirliyinin baş katibi Andreas Rayxhardt infrastruktur, texnologiyalar, təhsil sahələrində əməkdaşlığın inkişaf etdirilməsi barədə danışıb. Azərbaycanda iqtisadiyyatın şaxələndirilməsi istiqamətində dövlət başçısının imzaladığı sənədləri, həyata keçirilən tədbirləri yüksək dəyərləndirib.
Avstriya Milli Şurasının komitə sədrləri Gerald Hauzer və Yohannes Şmukenşlager çıxışlarında ölkələrində turizmin inkişafı, səhiyyə sahəsində əldə edilən nailiyyətlər barədə məlumat veriblər.
Görüşdə Milli Məclisin deputatları Sevinc Hüseynova, İlham Məmmədov, hər iki ölkənin səfirləri, digər rəsmi şəxslər iştirak ediblər.