“Bölgələrdən bölgələrə” yaradıcılıq festivalı mədəni irsimizin təbliğinə, istedadların tanınmasına imkan verir VİDEO
İsmayıllı, 29 iyul, AZƏRTAC
Azərbaycan Xalq Cümhuriyyətinin 100 illiyinə həsr olunan “Bölgələrdən bölgələrə” yaradıcılıq festivalı davam edir və növbəti tədbir iyulun 28-də İsmayıllı şəhərindəki “Qala” şadlıq sarayının qarşısında, uşaq əyləncə istirahət mərkəzində keçib.
AZƏRTAC-ın bölgə müxbiri xəbər verir ki, Mədəniyyət Nazirliyinin təşəbbüsü ilə “100 illik tariximiz” devizi altında reallaşdırılan, nazirliyin bütün regional idarələrinin iştirakını təmin edən bu layihə zəngin tarixə və dövlətçilik ənənələrinə malik olan xalqımızın mədəni irsinin təbliğinə, regionların mədəni potensialının nümayiş etdirilməsinə, mədəni əlaqələrin genişləndirilməsinə xidmət edir.
Festivalın təşkilat komitəsinin üzvü, ictimaiyyətlə əlaqələr üzrə koordinator Rövşən Nəcəfov tədbirin yay mövsümündə təşkilinin yerli sakinlərlə yanaşı, xarici ölkələrdən gələn turistlərə də Azərbaycanın zəngin və rəngarəng mədəni həyatı ilə ətraflı tanış olmaq imkanı yaratdığını bildirib.
Tədbir rayon rəhbərlərinin, ictimaiyyətin çoxsaylı nümayəndələrinin, habelə qonaqların iştirakı ilə təntənəli şəkildə keçib. Əvvəlcə iştirakçılar bayramsayağı bəzədilən uşaq əyləncə istirahət mərkəzində Mədəniyyət Nazirliyinin 15 regional idarəsi tərəfindən ayrı-ayrılıqda təşkil olunan sərgilərlə tanış olublar. Bölgələrin mədəni irsini əks etdirən xalq sənətkarlıq nümunələri, rəsmlər və digər əl işləri ilə yaxından tanışlıq, verilən məlumatlar böyük diqqət və maraqla qarşılanıb.
Yaradıcılıq festivalının ikinci hissəsi olan qala-konsert isə hər bir regional idarə üzrə folklor qruplarının, yerli incəsənət və bədii özfəaliyyət kollektivlərinin çıxışları ilə yadda qalıb. Kürdəmir regional mədəniyyət idarəsinin Füzuli rayonu nümayəndəliyinin solisti Xəqani Şahbazovun ifasında səslənən Qarabağ şikəstəsi, İsmayıllı regional mədəniyyət mərkəzinin “Lahıc”, rayonun İvanovka kəndinin “Slavyanoçka” folklor qruplarının çıxışları, 2015-ci il Muğam müsabiqəsi laureatı Azərbaycan Dövlət Radio və Televiziyasının solisti Elgiz Əliyevin ifa etdiyi “Mənim Azərbaycanım” mahnısı və sair çıxışlar böyük maraqla qarşılanıb.
İsmayıllıdan olan ziyalı Şahməmməd Soltanov aldığı təəssüratı AZƏRTAC-ın müxbiri ilə bölüşərək deyib: “Azərbaycan Xalq Cümhuriyyətinin 100 illiyinə həsr olunan “Bölgələrdən bölgələrə” yaradıcılıq festivalı respublikamızın ayrı-ayrı rayonlarında istedadların tanıdılması, bu rayonların mədəni potensialının nümayişi baxımından çox əhəmiyyətlidir”.
Dövlət qulluğu veteranı Valeh Salehov Xalq Cümhuriyyətimizin 100 illiyinə həsr edilən bu tədbirlə bağlı AZƏRTAC-ın müxbirinə deyib: “Azərbaycan xalqı qədim tarixə, zəngin mədəniyyətə malikdir. Bu gün ayrı-ayrı bölgələri təmsil edən sərgilərdə nümayiş olunan xalq sənəti nümunələri, rəsmlər, qadınların əl işlərinin nümunələri məndə iftixar hissi doğurur. Bəli, xalqımız zəhmətinə güvənən istedadlı xalqdır. Bu gün müstəqillik yolunda inamla irəliləyən və sürətli inkişaf yolunda olan ölkəmizdə tarixmizin, mədəni irsimizin təbliğinə, nümayişinə imkan verən bu cür təşəbbüslər təqdirəlayiqdir”.
Bölmənin digər xəbərləri
