18 İLDİR Kİ, ŞUŞANIN TƏBİİ SƏRVƏTLƏRİ ERMƏNİLƏR TƏRƏFİNDƏN DAĞIDILIR
Bakı, 7 may (AZƏRTAC). Şuşa şəhərinin işğalından 18 il ötür. Ərazisinin 20 faizini meşələr təşkil edən şəhərin ümumi sahəsi 29356 hektardır. Şuşanın ətrafındakı meşə və dərələrdə müxtəlif müalicə əhəmiyyətli mineral sular, dərman bitkiləri və çiçəklər geniş yayılmışdır.
Şuşa rayonunda təsdiq edilmiş ehtiyatları 1143 min kubmetr olan və işğala qədər istismara cəlb edilən Şuşa üzlük daşı yatağı, ehtiyatları 397 min kubmetr olan kərpic-kirəmid istehsalına yararlı Keçəldağ gil yatağı, istismar ehtiyatları 50 min kubmetr/gün olan Şuşa yeraltı şirin su yatağı, müalicəvi əhəmiyyətə malik 60 min kubmetr/gün və 25 min kubmetr/gün olan Şirlan və Turşsu mineral su yataqları vardır.
1988-ci ildə Şuşa və Əsgəran ərazisində nadir təbiət komplekslərini qorumaq üçün təşkil edilən Daşaltı Dövlət Təbiət Yasaqlığı 450 hektar ərazini əhatə edirdi. 1992-ci ildən işğal altında qalan yasaqlıq hazırda tamamilə məhv edilmişdir.
Şuşanın “Haça yal” adlanan sahəsində bitən 2000 ədəd palıd ağacı ermənilər tərəfindən doğranaraq aparılmışdır.
Azərbaycan Respublikası Ekologiya və Təbii Sərvətlər Nazirliyinin “İşğal olunmuş Azərbaycan ərazilərində ətraf mühitə və təbii sərvətlərə dağıdıcı təsiri müəyyənləşdirən (izləyən) operativ mərkəz”i işğaldan sonrakı dövrlərdə rayon ərazilərində müxtəlif vasitələrlə aparılmış videoçəkilişlərə baxaraq, təbii sərvətlərin ermənilər tərəfindən dağıdılmasına dair bir sıra faktları aşkarlamışdır.
Belə ki, Şuşa şəhərində yanacaq kimi Qarabağ meşələrinin nadir çoxillik ağaclarından istifadə olunmuşdur. Şuşa şəhərinin yuxarı hissəsində Dörd yol adlanan yerdən yuxarı Laçın küçəsinin solunda, Q.Əsgərov küçəsində, 200-ə yaxın müxtəlif növ iri diametrli çoxillik ağaclar kəsilmiş, ondan bir qədər irəlidə yolun sağında isə ağaclar bütünlüklə qırılmışdır. Zarıslı kəndində bütün ağaclar, o cümlədən məktəb həyətində olan dekorativ və meyvə ağacları tamamilə məhv edilmişdir. Şuşanın Topxana meşəsinin qoruq zonasında meşə sahəsi qırılaraq geniş düzənlik açılmış və orada inşaat işləri aparılmışdır.
Eyni zamanda, Şuşa şəhərindən cənubda, dəniz səviyyəsindən 1365 metr hündürlükdə yerləşən uzunluğu 114 metr olan “Xan Mağarası” amansızlıqla məhv edilmişdir.
Bölmənin digər xəbərləri
