Ləzgilərin qədim iməcilik adətlərini təbliğ edən “Mel” folklor ansamblı VİDEO
Qusar, 7 fevral, Elxan Yusifli, AZƏRTAC
“Mel” folklor ansamblı Qusar rayonun Hil kəndində fəaliyyət göstərir.
AZƏRTAC-ın bölgə müxbiri xəbər verir ki, folklor ansambl ölkəmizin mədəniyyət paytaxtı Şuşanın Cıdır düzündə keçirilən “Xarıbülbül” musiqi festivalında iştirakı ilə şöhrətini daha da artırıb.
Qusar rayonunda folklorun çoxəsrlik ənənəsi var. Rayon əhalisinin böyük hissəsini təşkil edən ləzgilər tarixin bütün dövrlərində öz adət-ənənələrini, mədəniyyətlərini qoruyub saxlayıblar.
Hil kəndində folklor ansamblının yaranma tarixi ötən əsrin 70-ci illərinə gedib çıxır. 1978-ci ildə kənd mədəniyyət evində yaradılan “Mel” folklor ansamblı yerli əhalinin qədim iməcilik adəti olan melin təbliği ilə məşğuldur. Ansambl həmin vaxt sovxozun fəhlələrindən, məktəblilərdən və mədəniyyət evinin işçilərindən təşkil olunmuşdu. Kollektiv 1979-cu ildə respublika festivalında üçüncü yerə, bir il sonra isə mədəni-maarif müəssisələrinin fəaliyyətinə ictimai baxışın yekunlarına görə Respublika Mədəniyyət Nazirliyinin keçici Qırmızı bayrağına və pul mükafatına layiq görülüb. 1987-ci ildə keçirilən II Respublika festivalının laureatı olmuş ansambla həmin il “Xalq kollektivi” adı verilib.
“Mel” kollektivinin bədii rəhbəri Xüzəmməd Paşayev bildirir ki, təqdim edilən əsas kompozisiyalardan birində gəlin köçən qızın cehiz hazırlığı təsvir olunub. Burada toy hazırlıqlarını vaxtında yekunlaşdıra bilməyən ailəyə iməcilik təşkil olunaraq kömək edilir. “Mel” sözünün mənası da elə könüllü iməcilik deməkdir. Eyniadlı folklor ansamblının təqdim etdiyi musiqili quruluşlarda da bu, öz əksini tapır.
Məlumdur ki, gəlin köçəcək qızın cehiz hazırlığı prosesi asan iş deyil. Folklor qrupu xalça, kilim toxunması, yun əyirib yorğan-döşək salınması və başqa bu kimi işləri el nəğmələrinin müşayiəti ilə təqdim edir. Təqdimat özündə əməyi, yardımsevərliyi təbliğ etməklə yanaşı, elin xeyir-duası ilə qurulan ailələrin möhkəmliyini də ehtiva edir.
“Biz ötən il Şuşanın Cıdır düzündə keçirilən “Xarıbülbül” musiqi festivalında iştirak etdik. Böyük qürur hissi ilə festivala qatıldıq. Çıxışımız maraqla qarşılandı. Şuşanı canlı görmək bizə qismət oldu. Allah şəhidlərimizə rəhmət eləsin, qazilərimizə cansağlığı versin. Bundan sonra keçiriləcək festivallarda da iştirak etmək istəyirik”, - deyə kollektivinin bədii rəhbəri Xüzəmməd Paşayev bildirib.
Hazırda 20 nəfərdən ibarət olan folklor qrupunun üzvləri bayram tədbirlərində yerli sakinlərlə bir yerdə toplaşır, qədim mahnıları səsləndirir, müxtəlif əyləncəli oyunlar keçirir və rəqs edirlər.
"Mel" kollektivinin bayram şənliklərində təqdim etdiyi quruluşda diqqəti çəkən məqamlardan biri də ansambl üzvlərinin nehrə çalxalamağı, beşik başında layla deyə-deyə corab toxumağıdır. Bu, köçən qızın hələ ata evində bütün ev işlərini, uşaq saxlamağı, bir sözlə, evdarlığı öyrənməyinin vacib olduğuna işarədir.
Folklor kollektivi rayonda və ölkənin başqa yerlərində keçirilən konsertlərdə, müsabiqələrdə və sərgilərdə də təmsil olunur. “Mel” sonuncu Respublika Folklor Festivalında 80 kollektiv arasında ikinci olmağı bacarıb.
Bölmənin digər xəbərləri
