Astaralı şagird Massaçusest Texnologiya İnstitutunun təqaüdünü qazanıb FOTO VİDEO
Astara, 16 mart, İsmayıl Cəfərli, AZƏRTAC
Astara təhsili daha bir uğura imza atıb. Rayonun 11-ci sinif şagirdi dünyanın ən məşhur ali təhsil ocaqlarından olan Massaçusest Texnologiya İnstitutunun təqaüdünü qazanıb. Söhbət kimya fənni üzrə həm respublika, həm də bir çox beynəlxalq fənn olimpiadalarında qalib gələn Salman Hüseynovdan gedir.
AZƏRTAC xəbər verir ki, Salman Zaman oğlu Hüseynov Astara rayonunun Pensər kəndində doğulub. O, Pensər kənd 2 nömrəli məktəb-liseyin 11-ci sinif şagirdidir. Hələ 4 yaşında olarkən Salmanın kitablara maraq göstərməsi, qismən oxumaq bacarığının olması ailəsini heyrətləndirirdi. Bunu daha çox anası, sonralar isə sinif rəhbəri olan Samera Hüseynova hiss edib: “Salman uşaqlıqdan nəyinsə axtarışında idi. Hələ 4 yaşında oxumağı öyrənmişdi, “Tumurcuq” qəzetini hecalarla oxuyurdu. Mən həm ana, həm də müəlliməsi kimi onun fitri istedadını hiss edirdim. O, ancaq oxuyurdu. Hələ kiçik yaşlarında 5-6-7-ci siniflərin dərsliklərinə maraq göstərirdi. Evdə hər tərəf kitabdır, o da kitablara meyil salmışdı. O vaxtdan kimya fənni ilə maraqlanırdı”.
Salmanın atası Zaman Hüseynov da müəllimdir. Ona kimya fənnindən dərs deyib. Hələ kiçik yaşlarından oğlunda bu sahəyə marağı olduğunu görən Zaman müəllim kimya fənnindən ona kurs da keçib. Kimyanı yaxşı mənimsəyən Salman növbəti illərdə qatıldığı olimpiadaların hər birində qalib gəlib. 8-ci sinifdə oxuyarkən Biologiya fənni üzrə 9-cu sinif şagirdləri arasında keçirilən Respublika Fənn Olimpiadasının da qalibi olub. Sonra 9-cu sinifdə Kimya fənni üzrə bürünc, 10-cu sinifdə isə yenə Kimya fənni üzrə qızıl medala layiq görülüb. Onun nailiyyətləri bununla bitməyib. 10-cu sinifdə oxuyarkən həm Beynəlxalq Mendeleyev Olimpiadasının, həm də 52-ci Beynəlxalq Kimya Olimpiadasının iştirakçısı olub. 2021-ci ildə Yaponiyada keçirilən 53-cü Beynəlxalq Kimya Olimpiadasında 3-cü yeri əldə edərək bürünc medal qazanıb.
“Kimya fənni 7-ci sinifdən tədris olunur. Artıq 5-6-cı siniflərdə oxuyanda hiss etdim ki, Salmanın kimyaya marağı var. Mənim universitet vaxtından qalan kimya kitablarımla maraqlanırdı. Bir gün onu kimya sahəsi üzrə hazırlaşdırmağımı istədi. Beynəlxalq olimpiadaların iştirakçısı oldu. Ən böyük uğuru isə 2021-ci ildə Yaponiyada keçirilən 53-cü Beynəlxalq Kimya Olimpiadasında 4 şagirddən biri kimi respublikamızı təmsil etməsi idi. Orada bürünc medala layiq görüldü. Sonra xaricdə təhsil almaq istədi və sənədlərini hazırladıq. İki gün öncə, martın 14-ü səhər saatlarında bu xoş xəbəri - Massaçusest Texnologiya İnstitutunun təqaüdünə layiq görüldüyünü eşitdik. Bizim üçün çox qürurvericidir. Həm valideyn, həm də müəllim kimi daha çox sevinirəm, qürur duyuram”, - deyə Zaman müəllim vurğulayır.
Əldə etdiyi bu uğurlara və qazandığı təqaüdə görə həm valideynlərinə, həm də müəllimlərinə borclu olduğunu deyən Salman bildirir ki, Massaçusest Texnologiya İnstitutundan təklif gəlməsi onun da ürəyincə olub: “Uğurlarıma görə ailəmə, müəllimlərimə və Beynəlxalq Olimpiada Hazırlıq Mərkəzinə minnətdaram. Nəticələr açıqlandıqdan sonra universitetlərə sənəd vermək barədə düşünürdüm. Koreyanın, Sinqapurun dövlət universitetlərinə, Amerikada 5 universitetə sənəd göndərdik. Hazırda qəbul olduğum Massaçusets Texnologiya İnstitutu dünyada tanınmış təhsil ocağıdır”.
Salmanın bu uğuruna daha çox sevinən isə təhsil aldığı Pensər kənd 2 nömrəli məktəb-liseyin pedaqoji kollektividir. Oxuduğu məktəbdə Salmanın kimya fənninə olan sevgisini hər kəs bilir. Məktəbin direktoru Şaiq Həsənov deyir ki, şagirdlərinin kimya fənni üzrə respublika və beynəlxalq olimpiadalarda qazandığı uğur məktəb-liseyin adını daha da ucalara qaldırır. “Biz Salmanın uğurlarını gözləyirdik. O, bundan əvvəllər də olimpiadalarda iştirak edərək uğurlar qazanıb. Salman gələcəkdə kimyaçı kimi təkcə Astaranı, Pensər məktəbini yox, bütün Azərbaycanı dünyada təmsil edəcək. Astaranın ilk təhsil ocağı kimi 110 illiyini qeyd edəcək Pensər 2 saylı tam orta məktəb-lisey üçün bu sevincli hadisə bir töhfə oldu”, - deyə direktor bildirir.
Qeyd edək ki, Salman Hüseynov hazırda Beynəlxalq Olimpiada Hazırlıq Mərkəzində kimya fənni üzrə dərslərdə iştirak edir.
Bölmənin digər xəbərləri
