İctimaiyyət nümayəndələri və media təmsilçiləri Bərdə Peşə Liseyində yaradılan şəraitlə tanış olublar VİDEO
Bərdə, 13 aprel, Tahir Ağaməmmədov, AZƏRTAC
Aprelin 13-də ötən il yenidən qurulan Bərdə Peşə Liseyinə infotur keçirilib. İnfoturda Peşə Təhsili üzrə Dövlət Agentliyinin direktor müavini, direktor vəzifələrini müvəqqəti icra edən Ceyhun Kərəmov, deputatlar Vüqar Bayramov, Fatma Yıldırım, Aydın Mirzəzadə, Ceyhun Məmmədov, Bakı Milli Geyim Evinin direktoru Könül Vəlibəyli, sosial biznes üzrə təlimçi, influnser Sara Rəcəbli, Təhsil və Kənd Təsərrüfatı nazirliklərinin nümayəndələri, həmçinin media təmsilçiləri və digər qonaqlar iştirak ediblər.
AZƏRTAC-ın bölgə müxbiri xəbər verir ki, infoturun məqsədi liseydə yaradılan şərait, tədris prosesi və imkanlar haqqında ictimaiyyət nümayəndələri və media təmsilçilərinin məlumatlandırılmasıdır. Əvvəlcə qonaqlara peşə təhsil müəssisəsinin tarixi, təmirdən öncəki vəziyyəti, mühəndis pedaqoji heyət, həmçinin liseyin yeni infrastrukturu haqqında geniş məlumat verilib. Qeyd edilib ki, peşə liseyində aparılan yenidənqurma işləri nəticəsində beynəlxalq standartlara cavab verən maddi-texniki baza ilə təchiz olunmuş 4 mərtəbəli tədris binası, 2 ədəd hər biri 192 yerlik yataqxana, 3 mərtəbəli emalatxana və laboratoriya korpusu, texnikaların saxlanması üçün 3 korpusdan ibarət qaraj və digər köməkçi binaların tikintisi həyata keçirilib. İnfotur iştirakçılarının nəzərinə çatdırılıb ki, sözügedən lisey Bərdə və ətraf regionlardan olan 1200 tələbəyə 7 peşə sahəsi üzrə 30-a qədər ixtisas üzrə təhsil imkanı yaradır.
İnfotur çərçivəsində peşə təhsil müəssisəsini bitirmiş və müxtəlif istiqamətlər üzrə uğurlu karyera quran məzunlarla da görüş keçirilib. Görüş zamanı qonaqların təcrübəsi dinlənilib və peşə təhsilində hazırda olan vəziyyət və gələcəkdə görüləcək işlərlə bağlı fikir mübadiləsi aparılıb.
Daha sonra qonaqlar liseydə yaradılan şəraitlə, emalatxanalarla əyani şəkildə tanış olublar. İnfotur iştirakçılarının çoxsaylı sualları cavablandırılıb.
Peşə Təhsili üzrə Dövlət Agentliyinin direktor müavini, direktor vəzifələrini müvəqqəti icra edən Ceyhun Kərəmov jurnalistlərə müsahibəsində deyib: “Bərdə Peşə Liseyi ölkəmizdə son illərdə açılan ən qabaqcıl, müasir regional təhsil mərkəzlərindən biridir. Burada 27 ixtisas üzrə hazırda 650-dən artıq tələbə təhsil alır. Tələbələr həm praktiki, həm də nəzəri biliklərə yiyələnirlər və əmək bazarı üzrə tələb olunan ixtisaslar üzrə hazırlıq keçirlər. Bərdə Peşə Liseyinin 1200 tələbə tutumu var. Burada 200-ə yaxın tələbənin yerləşdirilməsinə imkan verən müasir yataqxana kompleksi tikilib. Bu da imkan verir ki, liseydə təkcə Bərdədən deyil, ətraf rayonlardan olan tələbələr də peşə təhsili alsınlar. Məqsədimiz həm regionun iqtisadiyyatına xidmət edən peşə ixtisasları üzrə, həm də gələcəkdə işğaldan azad edilmiş ərazilərimizin yenidən qurulmasında ehtiyac olan sahələr üzrə mütəxəssislər yetişdirməkdir”.
Ceyhun Kərimov Türkiyə və Azərbaycanda olan peşə təhsili müəssisələri arasında əməkdaşlıqdan da danışıb. Bildirib ki, Türkiyənin Bursa şəhərində yerləşən bir neçə məktəbin nümayəndələri Bakıya səfər edib, ölkəmizin bir çox məktəbləri ilə, o cümlədən Bərdə məktəbi ilə qardaşlıq müqavilələri imzalanıb. Bərdə məktəbi ilə imzalanan əməkdaşlıq əsasən kənd təsərrüfatı, aqroservis istiqamətlərini özündə ehtiva edir.
Milli Məclisin deputatı Ceyhun Məmmədov: “Ölkəmizdə təhsilə böyük diqqət və qayğı var. Son illərdə peşə təhsilinə diqqətin daha da artırıldığının şahidiyik. Bu gün bizim qarşımızda duran ən mühüm vəzifələrdən biri müxtəlif sahələr üzrə peşəkar mütəxəssislər yetişdirməkdir. Xüsusilə də nəzərə alaq ki, Qarabağda bizi böyük quruculuq, abadlıq, tikinti işləri gözləyir. Belə bir regionda peşə məktəbinin fəaliyyətə başlaması çox önəmlidir. Biz artıq son vaxtlar müəyyən mənada ayrı-ayrı ixtisaslar üzrə mütəxəssislərin azlığını hiss edirdik. Amma artıq Azərbaycan bunu özü təmin edəcək. Artıq müxtəlif sahələr üzrə biz özümüz peşəkar mütəxəssislər yetişdiririk. Bu gün olduğumuz bu peşə məktəbi ən yüksək səviyyədə qurulubdur. Biz bu gün Azərbaycan gənclərinin müasir texnoloji biliklərə necə yiyələndiklərinin şahidi olduq. Sinifləri gəzdik, eləcə də laboratoriyalarda, emalatxanalarda olduq. Bir daha dövlətin təhsilə, bu sahəyə necə önəm verdiyini gördük. Mən fürsətdən istifadə edib, valideynlərə müraciət edirəm. Bizim vətəndaşlarımız adətən övladlarının daha çox ali təhsil almasına meyil göstərirlər. Bildirmək istəyirəm ki, bu gün artıq bizim yüksək peşə təhsili verən məktəblərimiz də var. Ali təhsildən əlavə, bizim gənclərimiz peşə təhsili də ala bilərlər. Bu da gələcəkdə onların işlə təmin olunmasına öz töhfəsini verə bilər”.
Bölmənin digər xəbərləri
