DÜNYA
20 İLDƏN SONRA GÜRCÜSTANDA İLK SU ELEKTRİK STANSİYASI İSTİFADƏYƏ VERİLMİŞDİR
Elektrik enerjisi istehsalı üçün zəngin su ehtiyatına malik olan Gürcüstanda 20 illik fasilədən sonra ilk su elektrik stansiyası işə salınmışdır. Pankisi dərəsində quraşdırılmış Xadori su elektrik stansiyasının layihə gücü 24 meqavatdır. Alazan çayının üstündə tikilən stansiya Gürcüstanın Kaxeti bölgəsində Çinin Slçuan şirkətinin inşa etdiyi ilk stansiyadır. 25 milyon dollar məbləğində sərmayə qoyulan bu stansiyanın inşasına üç il öncə başlanmışdı. Su elektrik stansiyası Kaxeti bölgəsinin elektrik enerjisinə tələbatını bütünlüklə ödəyəcəkdir.
Hazırda stansiyaya lisenziya verilməsi və enerjinin qiymətinin müəyyənləşdirilməsi məsələləri müzakirə olunur. Tikinti işləri aparılan zaman sərmayədarlara vergidə güzəşt barədə Gürcüstan hökuməti öz vədinə əməl etmədiyinə görə, çinli sərmayədarlar bir neçə milyon dollar artıq xərcləmək məcburiyyətində qalmışlar. Buna görə də stansiyanın ixrac etdiyi bir kilovat-saat elektrik enerjisinin dəyəri 12 tetriyə (6 sentə) başa gəlir. Halbuki, digər su elektrik stansiyalarında bu, 2-3 tetri həddindədir.