20 Yanvar hadisələrinin ərəb mediasında işiqlandırılması ilə bağlı tədbir keçirilib
Bakı, 18 yanvar, AZƏRTAC
Hazırda 420 milyondan artıq ərəbdilli auditoriya var ki, onları obyektiv informasiya ilə təmin etmək tələb olunur. Azərbaycanlı jurnalistlər, diplomatik nümayəndəliklər və ziyalılar hazırda bu işi layiqincə yerinə yetirməyə çalışırlar. Tarixi, dini və coğrafi bağlılıq ərəb dünyasını Azərbaycan üçün yaxın edib və onlar ermənilərlə informasiya müharibəsində ölkəmizin haqlı mövqeyini müdafiə edirlər.
AZƏRTAC xəbər verir ki, bunu Bakı Avrasiya Universitetində 20 Yanvar faciəsinin 33-cü ildönümünə həsr olunan “20 Yanvar hadisələri ərəbdilli mediada” mövzusunda keçirilən tədbirdə agentliyin Ərəb dilində informasiya bölməsinin müdiri Şıxəli Əliyev söyləyib. 20 Yanvar hadisələrinin ərəb mediasında işıqlandırılması ilə bağlı məruzə edən Ş.Əliyev deyib: “Biz, həmçinin ərəb ölkələrinin mediasının özünəməxsus xüsusiyyətlərini də nəzərə alırıq ki, bu da uğur faktorlarından biridir. Bütün bunlar o qədər də asan başa gəlmir. Çünki Suriyada, Livanda ərəbdilli ermənilər var ki, onlar Azərbaycana qarşı kifayət qədər antitəbliğat kampaniyası aparırlar. Ermənilər ərəb mediasında 20 Yanvar, Xocalı faciəsi ilə bağlı dərc olunmuş fotoşəkilləri özlərinin başına gələn hadisə kimi təqdim etməyə və ictimaiyyəti çaşdırmağa çalışırlar”.
Daha bir maraqlı faktı iştirakçıların diqqətinə çatdıran Ş.Əliyev bildirib ki, Azərbaycanın haqlı mövqeyini dünya ictimaiyyətinə çatdıran ərəbdilli şəxslərdən biri də İordaniyalı akademik Mərvan Sudah olub. O, xristian olsa da, ancaq 20 Yanvar, Xocalı faciələri, eləcə də Azərbaycan barədə digər həqiqətləri ərəbdilli oxuculara obyektiv şəkildə təqdim edir. Buna görə də həmin jurnalist zaman-zaman ermənilərin təzyiqlərinə məruz qalıb və təqib edilib, lakin buna baxmayaraq, mövqeyini dəyişməyib.
Ş.Əliyev sonda tədbirdə iştirak edən ərəb dili üzrə ixtisaslaşan tələbələrə müraciət edərək, onları 20 Yanvar hadisələrini əks etdirən yazılarla ərəbdilli mediada çıxış etməyə səslədi.
Universitetin Ərəbşünaslıq Mərkəzinin təşkilatçılığı ilə keçirilən anım mərasimində ali məktəbin prorektoru dosent Səyavuş Qasımov 20 Yanvar faciəsinin törədilməsini şərtləndirən səbəblərdən danışaraq, onun mediada əks etdirilməsi və doğurduğu rezonansı iştirakçıların diqqətinə çatdırıb. O qeyd edib ki, Azərbaycan xalqını dəhşət və müsibətə düçar etmiş 20 Yanvar faciəsi bütün dünyada əks-səda doğurub, mütərəqqi qüvvələrin qəzəb və hiddətinə səbəb olub. Buna görə də hadisə baş verən vaxtı bir çox ölkələrin radiostansiyaları, mətbuatı Qanlı Yanvar haqqında informasiya verir və onun təşkilatçılarını, icraçılarını qınayırdı. Azərbaycana dost ərəb ölkələri də bu hadisələr vaxtı və ondan sonra da ölkəmizin haqq səsinin çatdırılmasına bizimlə əməkdaşlıq edirdilər.
Ərəbşünaslıq Mərkəzinin icraçı direktoru dosent Mütəllim Rəhimov, dosent Ülviyyə Hüseynova çıxış edərək ərəb mediasında 20 Yanvar hadisələrinin işıqlandırılması, şərhi və ərəb ictimaiyyətində doğurduğu təəssüratlar barədə danışıblar.
Tədbirdə iştirak edən tələbələr ərəb mediasında 20 Yanvarla bağlı çap olunan bəzi məlumat və informasiyaları səsləndiriblər.
Bölmənin digər xəbərləri
