Bərdə, 23 aprel, Tahir Ağaməmmədov, AZƏRTAC

Bərdə rayonu Xanərəb kənd tam orta məktəbi üçün 624 şagird yerlik yeni bina inşa edilir.

Tikintidə iş icraçısı Mehdi Əzimov AZƏRTAC-ın bölgə müxbirinə bildirib ki, üç mərtəbədən, dörd korpusdan ibarət məktəb binasının ümumi tikinti sahəsi 2576 kvadratmetrdir. Yeni məktəb binasında 26 sinif otağı, kimya, biologiya və fizika laboratoriyaları, hərbi hazırlıq, informatika, əmək təlimi kabinələri, idman və akt zalları, kitabxana, məlumat informasiya mərkəzi, yeməkxana, inzibati otaqlar yaradılacaq. Həyətdə idman meydançası, qazanxana, nasosxana, transformator yarımstansiyası, generator, içməli, çirkab və yanğın əleyhinə su anbarları inşa ediləcək, abadlıq işləri aparılacaq, yaşıllıqlar salınacaq.

Hazırda binada dəmir-beton və hörgü işləri yekunlaşmaq üzrədir. Elektrik və santexnik işlərinə başlanılıb, zirzəminin suvağı tamamlanmaq üzrədir. Binanın inşasının bu il başa çatdırılması nəzərdə tutulur.

Xanərəb kəndində yeni ümumtəhsil məktəbi binasının tikintisinə başlanılması kənd sakinlərinin, ziyalıların, müəllimlərin, şagirdlərin və valideynlərin böyük sevincinə səbəb olub. Xanərəb kənd tam orta məktəbinin müəllimi Xəyal Rüstəmov bildirib ki, 1986-cı ildə inşa edilmiş binada tədris üçün şərait yaxşı deyildi. Bu isə tədrisin keyfiyyətinə mənfi təsir göstərirdi. Amma buna baxmayaraq, müəllim və şagird kollektivi çətin də olsa, təhsilini davam etdirirdi.

“Məktəbimiz üçün yeni binanın inşa edilməsi təhsilin səviyyəsinin yüksəlməsinə səbəb olacaq. Bunun üçün dövlətimizin başçısına müəllim və şagirdlər adından minnətdarlığımı bildirirəm. Biz müəllimlər yeni tikilmiş məktəb binasında tədrisin daha keyfiyyətli olmasına çalışacağıq. Əminik ki, bundan sonra təhsildə daha yüksək nəticələr əldə edəcəyik”, - deyə X.Rüstəmov vurğulayıb.