HEYDƏR ƏLİYEV - 1
İsveçdə Heydər Əliyevin 100 illik yubileyi münasibətilə film nümayiş olunub VİDEO
Stokholm, 11 may, Rauf Əliyev, AZƏRTAC
Heydər Əliyevin 100 illik yubileyi münasibətilə İsveçin paytaxtında Ulu Öndərin həyat yoluna həsr olunan film nümayiş olunub.
AZƏRTAC-ın xüsusi müxbiri xəbər verir ki, Azərbaycanın İsveç Krallığındakı səfirliyi tərəfindən təşkil edilən tədbir, Stokholmun mərkəzindəki Sergel kinoteatrında keçirilib.
Tədbirdə Azərbaycanın İsveç Krallığındakı səfiri Zaur Əhmədov xalqımızın Ümummilli Lideri Heydər Əliyevin anadan olmasının 100-cü ildönümünün dünyanın bir çox ölkələrində həmvətənlərimiz tərəfindən dərin hörmət və ehtiramla qeyd edildiyini bildirib.
Səfir deyib: “Bu böyük şəxsiyyət öz həyatını doğma xalqına həsr edərək Azərbaycanı daim inamla irəliyə aparmaqla inkişaf etməsinə nail olub. Heydər Əliyev həm sovet dönəmində, həm də müstəqillik illərində xalqımız üçün ən həlledici anlarda liderlik keyfiyyətləri və siyasi iradə nümayiş etdirərək ölkəmizi böyük bəlalardan qurtarıb”.
Zaur Əhmədov bildirib ki, “Heydər Əliyev İli” çərçivəsində Skandinaviya ölkələrində silsilə tədbirlərin keçirilməsi planlaşdırılıb və bu tədbir onlardan yalnız biridir. O, həm də İsveçin məşhur fotoqrafı və rejissoru Mikael Silkebergin yeni film üzərində iş apardığını bildirib. Səfirin sözlərinə görə, yeni sənədli film Ulu Öndər Heydər Əliyevin məşhur norveçli etnoqraf Tur Heyerdalla görüşlərindən və Skandinaviya ilə Azərbaycan arasında tarixi əlaqələrdən bəhs edəcək.
Tədbir “Azərbaycan memarı” filminin nümayişi və rəsmi ziyafətlə davam edib.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
