Deputat: Fransa Avropa Şurasında insan haqları və demokratiya ilə bağlı öhdəliklərini yerinə yetirə bilmir VİDEO
Strasburq, 11 oktyabr, AZƏRTAC
Fransa Avropa Şurasının təsisçisi kimi təşkilatın insan haqları, qanunun aliliyi və demokratiya ilə bağlı öhdəliklərini yerinə yetirə bilməyib.
Təqdim olunan hesabata görə, Fransa hüquq-mühafizə orqanlarının silahdan istifadə etməsi kütləvi nümayişlər zamanı ciddi xəsarət və ölümlərə səbəb olub. Əlcəzair-Mərakeş əsilli 17 yaşlı Nahel Merzukun yol polisi əməkdaşı tərəfindən güllələnərək öldürülməsi həddindən artıq güc və irqçiliyin sistemli xarakterinin nümunəsidir.
AZƏRTAC xəbər verir ki, bu fikirləri AŞPA-nın payız sessiyasında “Fransanın Avropa Şurasına üzvlükdən irəli gələn öhdəliklərə riayət etməsi”nə dair dövri hesabatın müzakirəsi zamanı qurumdakı nümayəndə heyətimizin üzvü Kamal Cəfərov çıxışında deyib. O bildirib ki, Fransa neokolonialist siyasətindən irəli gələrək, xaricdə insan hüquqlarını açıq şəkildə pozur. Xammal əldə olunmasında uşaq əməyindən istifadə edərək, Afrikanı istismar etməyə davam edir.
Azərbaycanlı deputat deyib ki, mövcud miqrasiya böhranına görə də Fransa məsuliyyət daşıyır. Afrikalılar Fransaya görə öz qitələrini tərk edirlər. Problemin həll yolu afrikalıları Avropaya köçürmək deyil, Afrikanı Fransadan azad etməkdir.
K. Cəfərov vurğulayıb ki, Fransa Mayotta adasında Komor adalarının suverenliyinə, eləcə də Yeni Kaledoniya xalqının və xaricdəki icmaların digər xalqlarının hüquqlarına hörmət etməlidir. Fransa bir milyon yarıma yaxın insanı qətlə yetirməklə əlcəzairlilərə qarşı soyqırımı törədib: “Əlcəzairin azadlığı uğrunda vuruşmuş döyüşçülərin kəllə sümükləri hələ də Paris muzeyində müharibə kuboku kimi saxlanılır. Bu, iyrənc haldır. Biz Fransa Prezidenti Emmanuel Makrondan bu qəhrəmanların qalıqlarını Əlcəzairə qaytarmağı tələb edirik”.
“Fransız qoşunlarının Niger, Mali və Burkina-Fasodan bu yaxınlarda çıxarılması Fransanın Afrikadakı bu heyrətamiz siyasətinin iflasa uğradığını bir daha nümayiş etdirdi. Fransa Ermənistanı yeni silah müqaviləsi ilə dəstəkləməklə Cənubi Qafqaz regionunda da eyni zərərli təcrübələri tətbiq etməyə çalışır. Belə yanaşma sülhə xidmət etmir, əksinə, yeni münaqişənin alovlanması məqsədi daşıyır. Bölgədə yeni münaqişə yaranarsa, Fransa məsuliyyət daşıyacaq”, - deyə azərbaycanlı deputat fikrini yekunlaşdırıb.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
