“Ermənilər uzaqdan bizi görəndə dəstək gəldiyini düşünüb sevinməyə başladılar” - Vətən müharibəsinin iştirakçısı ilə REPORTAJ VİDEO
Gəncə, 7 noyabr, Elcan Məmmədov, AZƏRTAC
Vətən müharibəsində torpaqlarımızın azad edilməsi uğrunda qarşıya qoyulan döyüş tapşırığını yerinə yetirərkən qəhrəmanlıq dastanı yazan igidlərdən biri də Müdafiə Nazirliyinin Xüsusi Təyinatlı Qüvvələrinin ehtiyata buraxılan hərbi qulluqçusu Orxan Quliyevdir. Onun Kəlbəcərdən başlayıb Şuşaya qədər uzanan şərəfli döyüş yolu ordumuzun “Dəmir yumruq” əməliyyatında göstərdiyi qəhrəmanlıq və şücaətin bariz nümunəsidir.
AZƏRTAC-ın bölgə müxbiri şanlı Qələbəmizin üçüncü ildönümü ərəfəsində Vətən müharibəsi iştirakçısı və XTQ mənsubu Orxan Quliyevlə görüşüb.
Quliyev Orxan Sabir oğlu 1989-cu il iyulun 21-də Rusiyada anadan olub. Gəncədə böyüyüb boya-başa çatan Orxan orta təhsilini Gəncə şəhər İ.Məmmədov adına 27 sayılı orta məktəbdə alıb. Hərbi xidmətini uğurla başa vurduqdan sonra 2010-cu ildən Daxili Qoşunların Xüsusi Təyinatlı Dəstəsində yenidən xidmətə qayıdıb. 2020-ci ildən isə O.Quliyev MN XTQ-nin tabeliyində xidmət etməyə başlayıb.
Mənfur düşmənin kapitulyasiya aktını imzalayaraq təslim olmasından bir gün əvvəl yaralanan Orxan bu Zəfərə illərdir hazırlaşdığını deyir: “Qarabağ ermənilər tərəfindən işğal olunanda mən uşaq idim. Həmin dövrdə xalqımızın çəkdiyi əziyyəti xatırlayıram. İllərlə xidmət etdiyim dövrdə sanki o gün üçün, Qarabağın azad olunması üçün özümü yetişdirmişəm. Kəlbəcərin Murovdağ istiqamətindən başlayan döyüş yolumda yoldaşlarımla birgə saysız-hesabsız tapşırıq yerinə yetirmişəm”.
Aldığı qəlpə yarasına görə səkkiz ay hərbi hospitalda müalicə alan O.Quliyev səhhəti ilə bağlı ordu sıralarından tərxis olunub.
“Müharibə dövründə bütün Qarabağı demək olar qarış-qarış gəzmişik. Sonuncu nöqtədə dayananda baxdıq ki, min kilometrdən çox məsafəni piyada qət etmişik. Sanki Allah bizə güc verirdi. Hava şəraiti o qədər əlverişli idi ki, istədiyimiz manevrləri edib, məsafələri qət edə bilirdik,”- deyə Vətən müharibəsinin qazisi bildirib.
O, ordumuzun çevik həmlələrinin və döyüş strategiyasının düşməni daim qorxu içərisində saxladığını söyləyir: “Füzuli istiqamətində hərəkətdə olarkən növbəti döyüş tapşırığı gəldi. Bildirildi ki, qarşıdakı düşmən postu alınmalıdır. Posta yaxınlaşanda bizdən bir qrup öndən atəş açmağa başladı. Cavab atəşi gəldikdə biz düşmən postunun arxasına yaxınlaşdıq və onlar uzaqdan bizi görəndə dəstək gəldiyini düşünüb sevinməyə başladılar. Bizim Azərbaycan əsgəri olduğumuzu anlayanda isə artıq gec idi, düşmənin postda olan canlı qüvvəsi məhv edilmişdi. Bu taktika ilə biz xeyli düşmən postunu ələ keçirmişik”.
Orxan Quliyev Vətən müharibəsindəki şücaətinə görə Müzəffər Ali Baş Komandan İlham Əliyev tərəfindən "Kəlbəcərin azad olunması görə", "Cəbrayılın azad olunmasına görə", "Füzulinin azad olunmasına görə", "Şuşanın azad olunmasına görə", "Cəsur döyüşçü" , "Qüsursuz xidmətə görə" və "Vətən müharibəsi iştirakçısı" medalları ilə təltif olunub.
Bölmənin digər xəbərləri
