Ermənilərin Gəncədə törətdikləri növbəti terrordan dörd il ötür

Gəncə, 17 oktyabr, Elcan Məmmədov, AZƏRTAC

2020-ci il oktyabrın 17-də gecə saat 1 radələrində Ermənistan növbəti dəfə Azərbaycanın ikinci ən böyük şəhəri olan Gəncəyə, mülki əhalinin sıx yaşadığı məhəlləyə - Aida İmanquliyeva və Samir Xasıyev küçələrinə SCUD/Elbrus ballistik raketi ilə hücum etdi. Nəticədə 15 dinc sakin həlak oldu, 55-dən çox insan yaralandı.

Erməni terrorunun qurbanları arasında Şahnazarovlar ailəsi də var. Ailənin yeganə yadigarı isə 7 yaşlı, hələ baş verənləri dərk etməyən balaca Xədicədir. O, ermənilərin dinc əhalini hədəf alan raket hücumları zamanı atası Röyal Şahnazarovu, anası Züleyxa Şahnazarovanı və kiçik bacısı Mədinə Şahnazarovanı itirib.

AZƏRTAC-ın bölgə müxbiri erməni terroru nəticəsində hər iki valideynini itirən balaca Xədicə, babası Nizami Ağayev və ailəsinin dörd üzvü şəhid olan Gəncə sakini Ramiz Qəhrəmanov ilə görüşüb.

Samuxda ana nənəsi Sevinc Ağayeva və babası Nizami Ağayevin himayəsində yaşayan balaca Xədicə o günləri xatırlamaq istəmir. Babası deyir ki, həmin vaxt Xədicə üç yaşında olsa da böyük gurultu səsini, dağıntılar altında qalmağını, gözlərinin toz-torpaqla örtüldüyünü hərdən yadına salır. Amma çox vaxt da bu mövzuda nə isə soruşanda susub qalır. Balaca Xədicə valideynlərinin yoxluğunun, eşitdiyi dəhşətli iniltilərin, dağıntıların travmasından yenicə ayrılıb. O, indi məktəbə gedir, ən böyük arzusu müəllim olmaqdır.

“Böyüyəndə müəllim olacağam. Uşaqlara dərs keçib, rəqəmləri, saymağı, yazmağı öyrədəcəyəm,” – deyə balaca Xədicə arzularını dilə gətirir.

Xədicənin babası Nizami Ağayev övladının yoxluğunda nəvəsi ilə təskinlik tapmağa çalışır. O, Gəncədə erməni terrorunu xatırlayarkən kövrəlir, dəhşətli günləri unuda bilmir: “Hadisənin üstündən 4 il ötür, amma mənə elə gəlir ki, dünən olub. Geriyə baxanda insanın yarası yenidən qanayır. Allah düşmənə lənət eləsin. Dövlətimiz sağ olsun ki, Xədicənin bütün təhsil xərclərini öz üzərinə götürüb, onu sahibsiz qoymur”.

Ramiz Qəhrəmanov da o dəhşətli günləri hələ unutmadığını, hər an film lenti kimi gözünün önündən keçdiyini bildirir: “Çox əzab-əziyyətli günlərimiz oldu. Bir qızım, üç nəvəm bir gecədə, yuxuda ikən erməni terroruna qurban oldu. Çox şeylər danışmaq istəsəm də, dilə gətirə bilmirəm...”, – deyə Ramiz dayı susur və gözləri dolur.

Həmin gecə Ramiz Qəhrəmanovun qızı, 34 yaşlı Xatirə Qəhrəmanova, onun övladları - 6 yaşlı Məryəm Xəlilli, 11 yaşlı Orxan Xəlilli və 18 yaşlı Ləman Qəhrəmanova dağıntılar altında qalaraq dünyasını dəyişiblər.

Xatırlatma: Ermənistan silahlı qüvvələri 44 günlük Vətən müharibəsində beynəlxalq hüququn norma və prinsiplərini, 1949-cu il Cenevrə konvensiyalarını və onların Əlavə protokollarını, habelə özlərinin israrlı xahişləri əsasında Moskvada keçirilmiş görüşün yekunu olaraq razılaşdırılmış humanitar atəşkəs rejiminin tələblərini pozaraq Azərbaycanın dinc əhalisini qəsdən hədəfə almaqla yaşayış məntəqələrini ağır artilleriyadan atəşə tutub. Azərbaycanın ikinci böyük şəhəri Gəncə 4, 5, 8, 11 və 17 oktyabr tarixlərində raket və ağır artilleriya hücumlarına məruz qalıb. Aralarında qadın və uşaqlar da olmaqla 26 mülki şəxs həlak olub, 175 nəfər isə yaralanıb. Şəhərdə mülki infrastruktur obyektlərinə, tarix-mədəniyyət abidələrinə, o cümlədən nəqliyyat vasitələrinə külli miqdarda ziyan dəyib.