Baş direktor: AQEM beynəlxalq əməkdaşlıq mexanizmlərini inkişaf etdirmək baxımından mühüm imkanlara malikdir VİDEO
Bakı, 9 sentyabr, AZƏRTAC
Bu gün Asiya dünya əhalisinin 60 faizini təşkil edir və qlobal inkişafın mühüm mərkəzlərindən birinə çevrilib. Bununla belə, təəssüf ki, regionumuzda təhlükəsizlik problemləri hələ də qalıb. Asiyada sabitliyin möhkəmləndirilməsi və əməkdaşlığın genişləndirilməsi bütün dövlətlər üçün prioritet olmalıdır.
AZƏRTAC xəbər verir ki, bu sözləri Beyin Mərkəzləri Forumunun 13-cü iclasının “İnkişaf vasitəsilə təhlükəsizliyin təşviqi - Asiyada təhlükəsizlik idarəçiliyinə yeni yanaşmaların araşdırılması” mövzulu sessiyasında Banqladeşin Beynəlxalq və Strateji Araşdırmalar İnstitutunun Baş direktoru İftekhar Anis deyib.
O qeyd edib ki, hazırda Banqladeşdə məcburi köçkünlərin sayının artması, eləcə də Şərqdə yaranan münaqişələrin qaçqın və məcburi köçkün böhranını dərinləşdirməsi narahatedici məqamdır. Bununla yanaşı, qeyri-ənənəvi təhlükələr, yəni, terrorizm, kibertəhlükəsizlik problemləri, iqlim dəyişikliyi və pandemiyalar getdikcə daha çox gündəmə gəlir.
“Asiya həm də təbii fəlakətlərdən ən çox təsirlənən regionlardan biridir. Statistikaya görə, yalnız 2020-ci ildən bəri regionda təbii fəlakətlərin iqtisadi nəticələri 30 faiz artıb. Qida və enerji təhlükəsizliyi məsələləri isə münaqişələrin dərinləşməsinə yol açır. Bunlar bizim görməli olduğumuz reallıqlardır. Lakin mən əminəm ki, Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) bu problemlərin həlli üçün ideal platforma ola bilər. Bu təşkilat üzv ölkələr arasında dialoqu gücləndirmək, birgə təşəbbüslər irəli sürmək və beynəlxalq əməkdaşlıq mexanizmlərini inkişaf etdirmək baxımından mühüm imkanlara malikdir. Biz AQEM-in rolunu gücləndirməliyik. Terrorizmə qarşı mübarizə, kibertəhlükəsizlik, iqlim dəyişikliyi ilə mübarizə, pandemiyaların nəticələrinin aradan qaldırılması kimi sahələrdə birgə tədbirlər görülməlidir. Texnologiya və logistika imkanlarının genişləndirilməsi isə regional əməkdaşlığı daha da səmərəli edə bilər”, - deyə Baş direktor vurğulayıb.
O əlavə edib ki, Asiyada təhlükəsiz idarəetmə mexanizmlərinin yaradılması bu regionun gələcəyi üçün prioritet istiqamətlərdən biri olmalıdır. Ancaq bu yolla dayanıqlı sabitlik və inkişafı təmin etmək mümkün ola bilər.
Bölmənin digər xəbərləri
