Maldiv adalarının Böyük Britaniyadakı səfiri: COP29 Sədrliyi beynəlxalq iqlim əməkdaşlığında güclü liderlik nümayiş etdirib VİDEO
London, 8 oktyabr, AZƏRTAC
Biz Azərbaycanın COP29 Sədrliyi dövründə göstərdiyi güclü liderlikdən və bu prosesin Braziliyadakı növbəti COP30-a qədər ardıcıl şəkildə davam etdirilməsindən çox məmnunuq.
Bunu AZƏRTAC-a açıqlamasında Maldiv adalarının Böyük Britaniyadakı səfiri Iruthisham Adam deyib. O, Londonda Millətlər Birliyi ilə əməkdaşlıq çərçivəsində təşkil edilən “Dəniz səviyyəsinin dəyişməsi və qeyri-bərabər nəticələr: Xəzər dənizi və inkişaf etməkdə olan kiçik ada dövlətləri (SIDS) üzrə təcrübələr” adlı yüksəksəviyyəli tədbirin önəminə diqqət çəkib. Səfir bildirib ki, tədbirdə Karib, Sakit okean, Hind okeanı və Xəzər dənizi regionlarından olan nümayəndələrinin iştirakı müxtəlif regionlarda dəniz səviyyəsinin dəyişməsinin təsirlərinə dair dərin təcrübə mübadiləsinə imkan yaradıb. “Biz birlikdə çalışırıq ki, Azərbaycanın COP29 Sədrliyi dövründə götürdüyümüz öhdəliklər real addımlarla həyata keçirilsin. Tədbirdə, həmçinin Braziliyanın gələcək COP üçün planları, təklifləri və dialoqa əsaslanan yanaşma tərzi barədə də məlumat verdilər. Biz COP30-a qədər bu əməkdaşlığı davam etdirməyə sadiqik”, - deyə o vurğulayıb.
Səfir bildirib ki, Millətlər Birliyi uzun illərdir ki, kiçik dövlətlərin, xüsusilə də iqlim dəyişikliyindən ən çox zərər çəkən kiçik ada dövlətlərinin səsini dünyaya çatdıran platformadır. “Maldiv adaları bu istiqamətdə fəal liderlərdən biridir. Biz iqlim dəyişikliyinin təsirlərinə qarşı mübarizədə kiçik ada və həssas ölkələrin maraqlarını müdafiə etməyə davam edirik”, - deyə diplomat bildirib.
O, Azərbaycanın COP29 Sədrliyinin iqlim ədaləti və itkilər və zərər mexanizminin maliyyələşdirilməsi istiqamətində mühüm addımlar atdığını deyib. “Biz hesab edirik ki, COP29 çərçivəsində qəbul edilən yeni təkliflər iqlim dəyişikliyindən ən çox zərər çəkən ölkələr üçün əlavə maliyyə resurslarının səfərbər olunmasına imkan verəcək. Bu isə beynəlxalq iqlim əməkdaşlığını və qlobal həmrəyliyi daha da möhkəmləndirəcək”, – deyə səfir bildirib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
