Abbas Abbasov: Beynəlxalq ictimaiyyət Afrikada törədilmiş insanlıq əleyhinə cinayətləri hələ də lazımi şəkildə qiymətləndirməyib VİDEO
Bakı, 17 oktyabr, AZƏRTAC
Oktyabrın 7-17-də Polşanın paytaxtı Varşava şəhərində ATƏT-in İnsan Ölçüsü Konfransı keçirilib. Konfransda ATƏT-ə üzv 57 ölkənin nümayəndələri, ATƏT institutlarının və digər icra strukturlarının, həmçinin hökumətlərarası qurumların və qeyri-hökumət təşkilatlarının təmsilçiləri iştirak ediblər.
AZƏRTAC xəbər verir ki, Bakı Təşəbbüs Qrupunun icraçı direktoru Abbas Abbasov tədbirin irqçilik, ksenofobiya, ayrı-seçkilik, dini dözümsüzlük, insan alveri və fundamental azadlıqlar kimi qlobal problemlərə həsr olunmuş üç plenar sessiyasında çıxış edib.
O, çıxışlarında bəzi ölkələrin müstəmləkəçilik və neokolonial siyasətini bu gün də davam etdirdiyini təəssüflə bildirib və bunun acı nəticələrinə dair real faktları iştirakçıların diqqətinə çatdırıb.
Bu kontekstdə o, Belçikanın Afrikada törətdiyi vəhşilikləri yada salaraq, Konqonu istismar və insan əzabının ən dəhşətli nümunələrindən biri kimi təqdim edib. Abbas Abbasov vurğulayıb ki, Afrikada həyata keçirilmiş insanlıq əleyhinə cinayətlər hələ də beynəlxalq ictimaiyyət tərəfindən lazımi şəkildə qiymətləndirilməyib, bu da ciddi ədalətsizlikdir.
O, həmçinin Belçikanın Konqodakı kolonial dövründə yerli dinlərin məhv edildiyini, mədəni normaların zorla tətbiq olunduğunu və bunun nəticəsində bu günə qədər davam edən dərin mədəni və mənəvi yaraların yarandığını qeyd edib.
Abbas Abbasov, eyni zamanda, Fransanın dənizaşırı ərazilərində - Yeni Kaledoniya, Qvadelupa, Martinika və Mayot kimi bölgələrdə yerli xalqların ikinci dərəcəli vətəndaş statusunda yaşadıqlarını diqqətə çatdırıb. O, Qvadelupa və Martinikada Karib hövzəsinin Afrika mənşəli əhalisinin qərar qəbuletmə proseslərindən sistemli şəkildə kənarlaşdırıldığını və bərabər iqtisadi imkanlardan məhrum edildiyini vurğulayıb.
Mayot adasında əhalinin əksəriyyətini təşkil edən müsəlmanların məqsədyönlü şəkildə təcrid siyasətinə məruz qaldığını, adanın isə hərbiləşdirilmiş qalaya çevrildiyini vurğulayıb.
O əlavə edib ki, Fransız Qvianası və Reyunyonda iqtisadi asılılıq, işsizlik və ekoloji fəlakətlər yerli əhalini məcburi köçkünlüyə və insan alveri şəbəkələrinin hədəfinə çevirib. Bu ərazilərdə insan alveri müasir dövrdə kolonial köləliyin davamı kimi qiymətləndirilə bilər.
Bölmənin digər xəbərləri
