Prezident Kitabxanasında "Heydər Əliyev və mədəniyyət” mövzusuna həsr olunmuş tədbirlər silsiləsinin ilk mərhələsi – “Rəşid Behbudov 110” adlı dəyirmi masa təşkil olunub VİDEO
Bakı, 9 dekabr, AZƏRTAC
Dekabrın 9-da Prezident Kitabxanası və “Bizi Birləşdirən Mədəniyyət” İctimai Birliyinin birgə təşkilatçılığı ilə "Heydər Əliyev və mədəniyyət” mövzusuna həsr olunmuş tədbirlər silsiləsinin ilk mərhələsi – “Rəşid Behbudov 110” adlı dəyirmi masa keçirilib.
AZƏRTAC xəbər verir ki, Prezident Kitabxanasının İncəsənət zalında keçirilən tədbirdə Azərbaycan mədəniyyətinin müxtəlif sahələrini təmsil edən tanınmış incəsənət və mədəniyyət xadimləri iştirak ediblər.
Tədbirdə çıxış edən Prezident Kitabxanasının direktoru, professor Afət Abbasova bildirib ki, Ümummilli Lider Heydər Əliyevin mədəni irsin davamlı inkişafına dair formalaşdırdığı strateji baxış bu gün Prezident İlham Əliyev tərəfindən ardıcıl və məqsədyönlü şəkildə həyata keçirilir və müasir siyasətin əsasını təşkil edir. Onun sözlərinə görə, silsilə tədbirlərin başlanğıcının Rəşid Behbudovun yubileyinə həsr olunması həmin siyasətin məntiqi davamıdır.
O həmçinin qeyd edib ki, Azərbaycanın Birinci vitse-prezidenti Mehriban Əliyevanın Azərbaycan musiqi irsinin qorunması, sistemli şəkildə toplanması və dünyada tanıdılması istiqamətində gördüyü işlər xüsusi dəyər daşıyır. Professor vurğulayıb ki, Mehriban xanım Əliyeva təkcə musiqi mədəniyyətimizin inkişafında deyil, ümumilikdə milli-mədəni irsimizin beynəlxalq səviyyədə təqdimatında müstəsna rol oynayır və bu mənada Azərbaycan mədəniyyətinin əsl himayədarı və ilhamverici simasıdır.
"Bizi Birləşdirən Mədəniyyət" İctimai Birliyinin sədri, Əməkdar artist Ramil Qasımov böyük sənətkarın Azərbaycan musiqi mədəniyyətinə verdiyi töhfələrdən danışıb. O, Rəşid Behbudovun həm vokal məktəbinin formalaşmasında, həm də Azərbaycan musiqisinin dünyaya təqdim olunmasında misilsiz rol oynadığını deyib: “Rəşid Behbudov xalqımızın duyğularını, sevincini, həsrətini və ən əsası, mədəniyyətimizin ruhunu dünyaya çatdıran misilsiz bir sənət elçisi idi. Onun səsi ilə Azərbaycan musiqisi sərhədləri aşdı, Avropa səhnələrində, Asiya ölkələrində böyük rəğbət qazandı. Bu gün də həmin səs canlıdır, çünki o səs xalqa xidmət edən bir ürəkdən doğmuşdu”.
O bildirib ki, belə tədbirlərin keçirilməsi gənc ifaçılar üçün böyük məktəbdir və Rəşid Behbudovun irsinin yaşadılması mədəniyyət sahəsində vacib istiqamətlərdən biridir.
Sonra tədbirdə SSRİ Xalq artisti, Dövlət mükafatları laureatı, Sosialist Əməyi Qəhrəmanı, dünyaşöhrətli müğənni Rəşid Behbudova həsr olunmuş videoçarx nümayiş etdirilib.
Videoçarx sənətkarın zəngin ifa irsini və vokal məktəbinin özünəməxsus xüsusiyyətlərini göstərib, həmçinin onun Azərbaycan musiqisinin dünyada tanıdılmasındakı töhfələrini əks etdirib.
Daha sonra çıxış edən Xalq artisti Faiq Sücəddinov Rəşid Behbudovun yaradıcılıq möhtəşəmliyi və musiqi mədəniyyətimizdə yaratdığı məktəb barədə danışıb: “Rəşid Behbudov kimi sənətkarlar hər əsrdə bir dəfə dünyaya gəlir. Onun ifa tərzi, melodiyanı hiss etmə qabiliyyəti, səhnə mədəniyyəti bütün musiqiçilər üçün örnəkdir. O, həm Azərbaycanın, həm də Türk dünyasının ortaq musiqi xəzinəsində əvəzsiz bir zirvədir.”
Azərbaycan Rəssamlar İttifaqının sədri Fərhad Xəlilov çıxışında böyük sənətkarın yalnız musiqi deyil, bütövlükdə Azərbaycan mədəniyyətinə verdiyi əvəzsiz töhfələrdən bəhs edib. O vurğulayıb ki, Rəşid Behbudovun səhnə obrazı incəsənətdə harmoniya və zövq nümunəsi kimi bu gün də sənət adamlarına ilham verir.
Rəşid Behbudov Fondunun direktoru Kamil Şahverdi isə böyük sənətkarın irsinin qorunması və gələcək nəsillərə çatdırılması istiqamətində həyata keçirilən layihələrdən bəhs edib: "Rəşid Behbudov yalnız bir dövrün sənətkarı deyildi, o, Azərbaycan musiqisinin dünyaya açılan siması idi. Onun irsi bu gün də tükənməz enerji ilə yaşayır və biz Fond olaraq bu irsi daha geniş auditoriyaya çatdırmaq üçün müxtəlif layihələr həyata keçiririk".
Tədbirdə Xalq artisti Faiq Sücəddinov, Əməkdar artistlər Emil Əfrasiyab, Ramil Qasımov, gənc ifaçı Orxan Cəlilov tərəfindən musiqi nömrələri təqdim olunub.
Sonda professor Afət Abbasova yekun nitqində dəyirmi masada səslənən məruzə və mülahizələrin Rəşid Behbudov irsinin daha dərindən anlaşılmasına mühüm töhfə verdiyini vurğulayıb və iştirakçılara təşəkkürünü bildirib. O qeyd edib ki, bu görüş silsilənin ilk tədbiridir və növbəti görüşlər də Azərbaycan mədəniyyətinin aparıcı simalarını bir araya gətirəcək.
Bölmənin digər xəbərləri
