“İşıqlı düşüncə, sağlam gələcək” - Akademik Zərifə Əliyevanın anadan olmasının 103-cü ildönümünə həsr olunmuş konfrans VİDEO
Şamaxı, 27 aprel, AZƏRTAC
Şamaxı rayonunda görkəmli oftalmoloq-alim, Əməkdar elm xadimi, akademik Zərifə Əliyevanın anadan olmasının 103-cü ildönümünə həsr edilmiş “İşıqlı düşüncə, sağlam gələcək” adlı regional elmi-praktik konfrans təşkil olunub.
AZƏRTAC-ın bölgə müxbiri xəbər verir ki, konfrans Tibbi Ərazi Bölmələrini İdarəetmə Birliyinin (TƏBİB) dəstəyi, Şamaxı Rayon Mərkəzi Xəstəxanası və Azərbaycan Səhiyyə İşçiləri Həmkarlar İttifaqı Respublika Komitəsinin birgə təşkilatçılığı ilə keçirilib.
Tədbirin əsas məqsədi səhiyyə sahəsində müasir yanaşmaların müzakirəsi, tibbi bilik və təcrübə mübadiləsinin təşkili, eləcə də əməkdaşlıq əlaqələrinin daha da möhkəmləndirilməsi olub.
Tədbirdə çıxış edən Şamaxı Rayon İcra Hakimiyyətinin başçısı Tahir Məmmədov akademik Zərifə Əliyevanın Azərbaycan tibb elminə verdiyi mühüm töhfələrdən bəhs edərək, onun xüsusilə oftalmologiya sahəsindəki xidmətlərinin bu gün də böyük əhəmiyyət daşıdığını vurğulayıb. O, regionlarda səhiyyə infrastrukturunun inkişafının vacibliyini qeyd edib və belə tədbirlərin həkimlərin peşəkar inkişafına mühüm töhfə verdiyini bildirib.
TƏBİB-in İxtisaslı Tibbi Xidmətin Təşkili Departamentinin rəhbəri Nəzrin Mustafayeva çıxışında vurğulayıb ki, TƏBİB-in tabeliyində fəaliyyət göstərən tibb müəssisələrində 20-yə yaxın göz mərkəzi yaradılıb və bu günədək 40 minə yaxın göz əməliyyatı uğurla icra olunub. O, həmçinin akademik Zərifə Əliyevanın elmi irsinin bu gün də aktuallığını qoruduğunu diqqətə çatdırıb.
Azərbaycan Səhiyyə İşçiləri Həmkarlar İttifaqı Respublika Komitəsi sədrinin müşaviri Şöhrət Qədimov çıxışında akademik Zərifə Əliyevanın səhiyyə sahəsinə verdiyi töhfələrin bu gün də böyük örnək olduğunu diqqətə çatdırıb. O, komitə tərəfindən səhiyyə işçilərinin əmək, sosial və hüquqi müdafiəsinin gücləndirilməsi, onların rifah halının yaxşılaşdırılması, sağlamlıq və istirahət imkanlarının genişləndirilməsi istiqamətində həyata keçirilən tədbirlərdən bəhs edərək konfransın işinə uğurlar arzulayıb.
Şamaxı Rayon Mərkəzi Xəstəxanasının direktoru Natiq Əliyev jurnalistlərə müsahibəsində deyib ki, elmi-praktik tədbirlərin keçirilməsi akademik Zərifə Əliyevanın zəngin irsinin yaşadılması və region səhiyyəsinin inkişafı baxımından mühüm əhəmiyyət daşıyır.
Onun sözlərinə görə, Şamaxıda keçirilən bu elmi-praktik konfrans akademikin formalaşdırdığı zəngin elmi məktəbin və humanist prinsiplərin bu gün də yaşadılmasının bariz nümunəsidir: “Akademik Zərifə Əliyevanın səhiyyə sahəsində qoyduğu dərin izlər, yaratdığı elmi irs və peşəkar yanaşma bu gün Azərbaycan səhiyyəsinin əsas dayaqlarından biri olaraq qalır. Akademikin müəyyənləşdirdiyi prinsiplər əsasında formalaşan tibbi məktəb bu gün də həkimlər üçün örnəkdir və minlərlə insanın sağlamlığına qovuşmasında mühüm rol oynayır”.
Natiq Əliyev vurğulayıb ki, dövlətçilik prinsiplərinə söykənən bu yanaşma, xüsusilə də Prezident İlham Əliyevin səhiyyə sahəsi qarşısında müəyyən etdiyi əsas vəzifələrlə tam uzlaşır. Regionlarda tibbi kadr potensialının gücləndirilməsi, həkimlərin bilik və bacarıqlarının artırılması dövlət siyasətinin mühüm istiqamətlərindən biridir.
Direktor qeyd edib ki, keçirilən konfrans yalnız yubiley tədbiri deyil, həm də Dağlıq Şirvan regionunda çalışan həkimlərin maariflənməsi, onların yeni tibbi biliklər əldə etməsi və peşəkar inkişafına dəstək verən əhəmiyyətli platformadır: “Tədbirdə iştirak edən spikerlərin çıxışları region səhiyyəsinin inkişafına, həkimlərin daha müasir yanaşmalarla işləməsinə və nəticə etibarilə insanlara daha keyfiyyətli tibbi xidmət göstərilməsinə böyük töhfə verəcək”.
Konfrans çərçivəsində akademik Zərifə Əliyevanın həyat və fəaliyyətinə həsr olunmuş qısametrajlı film nümayiş etdirilib.
Daha sonra müxtəlif multidisiplinar tibbi mövzular üzrə elmi məruzələr təqdim olunub. Həkim Azər Əhmədov oftalmologiya sahəsində müasir yanaşmalar və praktik təcrübələr barədə çıxış edib.
Həmçinin iştirakçılar - Mədinə Fərziyeva, Vüsalə Yaşar və Zakir Quliyev tərəfindən pediatrik yaş qrupunda rast gəlinən göz xəstəliklərinin simptomları, diabetik retinopatiyanın diaqnostikası və müalicə mərhələləri, infeksion xəstəliklər zamanı göz təzahürləri, eləcə də revmatoloji xəstəliklərdə göz əlamətlərinin erkən aşkarlanması kimi aktual mövzular geniş təqdim olunub.
Konfransın sonunda bu kimi elmi-praktik tədbirlərin davamlı keçirilməsinin səhiyyə sahəsində peşəkar inkişaf və təcrübə mübadiləsi baxımından xüsusi əhəmiyyət daşıdığı vurğulanıb.
Bölmənin digər xəbərləri
