Təbii fəlakətlər aqrar sığortaya müraciətləri kəskin artırdı: 35 rayondan 3500-dən çox müraciət daxil olub VİDEO
Tərtər, 5 iyun, AZƏRTAC
Son günlər ölkəmizin müxtəlif bölgələrində havaların qeyri-sabit keçməsi, güclü yağış, dolu yağması, sel-subasma hadisələri, fırtına-qasırğa kimi hallar müşahidə edilir. Bu hadisələr kənd təsərrüfatı və əkin sahələrinə də zərər vurmaqdadır. Bununla əlaqədar olaraq sığortalı fermerlər tərəfindən Aqrar Sığorta Fonduna zərər müraciətlərinin sayı kəskin artıb.
Aqrar Sığorta Fondunda bütün müraciətlər qeydə alınır, yerlərdə əraziyə baxış keçirilməsi, hadisənin araşdırılması və zərərin hesablanması üçün bölgələrə aqrar sığorta ekspertləri yönəldilir. Hazırda Aqrar Sığorta Fondunun bütün ekspertləri bölgələrdə təsərrüfatlara və əkinlərə dəymiş zərərlərin qiymətləndirilməsi ilə məşğuldurlar.
Fondun İdarə Heyəti sədrinin müşaviri Rəvan Səmədli Tərtərdə AZƏRTAC-ın bölgə müxbirinə müsahibəsində bildirib ki, güclü yağışların yeni dalğasının başladığı may ayının əvvəlindən indiyədək Aqrar Sığorta Fonduna ölkənin 35 rayonundan 3500-dən artıq müqavilə üzrə zərər müraciətləri daxil olub. “Bu müraciətlər 53 min hektar əkin sahəsini əhatə edən müqavilələr üzrədir. Bunun 52 min hektarı taxıl sahələridir. Zərər müraciətləri, eləcə də alma, armud, badam, ərik, fındıq, gilas, nar, nektarin, pambıq, qoz və şaftalı bitkilərini əhatə edib”.
Onun sözlərinə görə, ən çox müraciətlər Şəki-Zaqatala, Qarabağ, Şirvan-Salyan, Dağlıq Şirvan və Qazax-Tovuz bölgələrindən gəlib. Bu dövrdə ən çox baş verən hadisələr çayların daşması nəticəsində sel-subasma, fırtına, qasırğa, dolu və 3-cü şəxslərin hərəkətləri olub. Son həftə ərzində daxil olan müraciətlərin əsas səbəbi isə dolu və fırtına-qasırğa hallarıdır. Şirvan-Salyan, Aran və Şimal regionu üzrə ən çox müraciətlər sel-subasma, Qarabağ və Mil-Muğan bölgəsi üzrə əsas hadisələr isə fırtına-qasırğa və dolu ilə əlaqədar olub.
Rəvan Səmədli qeyd edib ki, zərərin həcmindən və hadisədən asılı olaraq fermerlərə sığorta ödənişləri barədə qərar veriləcək. Hadisə baş vermiş, yəni haqqında müraciət daxil olan əkin sahəsinə 5-7 gün ərzində aqrar sığorta eksperti yönəldilir. Ekspert əkin sahəsində hadisənin baş verib-vermədiyini, hansı hadisənin baş verdiyini araşdırır və müəyyən edir. Eləcə də ekspert tərəfindən hadisə olan əkin sahəsinin fermerin rəsmi bəyan etdiyi koordinatlara aid olması dəqiqləşdirilir və ilkin zərər həcmi hesablanır. Əgər əkinin tamamilə məhv olması dəqiqləşərsə, fermerə ödənişin verilməsi prosesinə başlanılır.
“Əkin sahəsində tam yox, qismən məhvolma halı müəyyən edilərsə, zərər ödənişinin verilməsi üçün məhsul yığımı vaxtına qədər gözlənilir, məhsul yığımına 5 gün qalmış ekspert 2-ci dəfə həmin sahəyə səfər edərək zərəri son dəfə qiymətləndirir və ekspert rəyinə uyğun olaraq fermerə ödəniş həyata keçirilir”, - deyə o əlavə edib.
Xatırladaq ki, aqrar sığorta mexanizmi əkin sahələrini çoxsaylı təbiət hadisələri – dolu, sel-subasma, fırtına-qasırğa, leysan, normadan artıq yağan qar, torpaq sürüşməsi, eləcə də yanğın, vəhşi heyvanların hücumu, 3-cü şəxslərin hərəkətlərindən və sair hallardan qoruyur. Fermerlərə dəstək məqsədilə sığorta haqqının yarısını dövlət ödəyir. Nəticədə fermerlər cüzi ödəniş etməklə əkin sahələrini asanlıqla sığortalaya bilərlər.
Fermerlər sığorta haqlarının məbləği və şərtləri ilə Aqrar Sığorta Fondunun rəsmi internet səhifəsindən (asf.gov.az) tanış ola bilərlər.
Müxbir – Tahir Ağaməmmədov
Bölmənin digər xəbərləri
