Zaqatalanın zəngin cüdo irsi və Olimpiya çempionlarının yetişdiyi "uğurlu zal" - REPORTAJ VİDEO
Zaqatala, 5 iyun, AZƏRTAC
AZƏRTAC idmanın təbliğinə yönəlmiş "Bölgələrdə idman" layihəsi çərçivəsində növbəti reportajını təqdim edir. Bu dəfə agentliyimizin bölgə müxbiri zəngin cüdo ənənələri olan Zaqatala rayonuna yollanıb.
Zaqatalada idmana hər zaman böyük maraq olub. Bu rayonda futboldan sonra ən çox sevilən idman növünün cüdo olduğunu desək, yanılmarıq.
Gənclər və İdman Nazirliyinin Zaqatala Uşaq-Gənclər İdman Məktəbinin direktoru, Azərbaycan Cüdo Federasiyasının Cüdo Təlim Mərkəzinin rəhbəri, Əməkdar məşqçi Əfqan Rzayev bizi mərkəzin zalında qarşılayır. O bildirir ki, günün ikinci yarısından başlayaraq axşam saatlarına kimi bu zal idmançılarla dolub-daşır: "Bəzən vaxt məhdudiyyəti yarananda azyaşlıların təlim-tədrisini daha tez başlayırıq, yuxarı yaş qrupları üçün isə əlavə məşqlər təşkil edirik".
Əfqan müəllimlə söhbətimizdə cüdonun Zaqataladakı formalaşma tarixindən də söz açırıq. Məşqçi elə dayandığımız bu zalda 1983-cü ildən ilk məşqlərə başladığını qeyd edib. "Zaqatalada cüdo idman növünün təməli 1980-ci ildə qoyulub. Rayonumuz 1980-ci illərin əvvəllərindən yığma komandanın təlim-məşq bazası rolunu oynayıb. Sovetlər dövründə Zaqatalanın Car kəndi ərazisində “Turbaza” adlı turizm-istirahət mərkəzi fəaliyyət göstərirdi. Cüdo üzrə yığma komandanın üzvləri orada məskunlaşar, bu zalda və dağlıq ərazilərdə, bəzən isə açıq havada təlim-məşq toplanışları keçərdilər”, - deyə o bildirib.
Əməkdar məşqçi o illərdə Azərbaycan yığma komandasının üzvlərinin və məşqçilərinin böyük bir ailəni xatırlatdığını vurğulayır. Avropa və dünya birinciliklərində uğur qazanan bir çox idmançının məhz bu zalda yetişdiyini söyləyən Əfqan Rzayev əlavə edir: "Olimpiya çempionları Nazim Hüseynov, Elnur Məmmədli, eləcə də dünya çempionu Elxan Məmmədov məhz bu zalda məşq edərək beynəlxalq yarışlara yollanıb və yüksək nəticələr qazanıblar".
Mütəxəssisin yaddaşına həkk olunan xoş xatirələrdən biri də zaqatalalı idmançıların qazandığı uğurların əvvəlcə Bakıda, ardınca isə mütləq bu zalda daha təntənəli şəkildə qeyd olunmasıdır. Deyir ki, bu, həm də yeniyetmə və gənclərə böyük motivasiya olurdu.
Əməkdar məşqçi vaxtilə məhz bu zalda Azərbaycan çempionatlarının və dəfələrlə ölkə birinciliklərinin təşkil olunduğunu da vurğulayır. Bir sözlə, Zaqatala 10 ildən artıq bir müddətdə yığma komandanın bazası kimi fəaliyyət göstərib, bölgədə zəngin cüdo ənənələri və tarixi bir irs formalaşıb.
1980-ci ildən başlayan bu ənənələrin bu gün də uğurla davam etdiyini vurğulayan Əfqan müəllim mərkəzin hazırkı fəaliyyəti barədə məlumat verib: "Təkcə bu zalda 200-dən çox yeniyetmə və gənc davamlı olaraq məşqlərdə iştirak edir. Sevindirici haldır ki, idmançılarımız arasında respublika çempionatlarının, ölkə birinciliklərinin, beynəlxalq turnirlərin, həmçinin Avropa birinciliklərinin qalib və mükafatçıları az deyil".
Zaldan yetişən idmançılar sırasında Avropa Gənclər Olimpiya Festivalının qalibləri də var. Məktəbin yetirmələri olan Ramin Qurbanov, Gözəl Zutova, Kamilla Tooluyeva, Dilqəm Vəliyev, Oruc Əliyev və onlarla digər cüdoçunun adını qürurla çəkmək olar.
Əməkdar məşqçi hazırda yığma komandaların heyətində yer alan zaqatalalı idmançıların sayının da yetərincə olduğunu xatırladır. O, idmançıların əzmkarlığı sayəsində növbəti Avropa və dünya çempionatlarından, Qran-Pri yarışlarından, beynəlxalq turnirlərdən yeni qələbə soraqları gələcəyinə əmindir.
Zalda məşq edən və fasiləyə çıxan yeniyetmə idmançılarla da həmsöhbət oluruq. Onlardan biri – Zahidə Davudova rayonun ucqar Mamrux kəndindən gəlib. Bir neçə ildir cüdo ilə məşğul olan Zahidə məşqçisinin dediyinə görə, əzmkarlığı və mübarizliyi ilə seçilir. Yeniyetmə idmançı bizimlə söhbətində qarşıdakı yarışlara ciddi hazırlaşdığını və məşqçilərinin etimadını doğrultmağa çalışacağını bildirir.
Digər perspektivli idmançı isə Tofiq Cumayevdir. Altı yaşından cüdo ilə məşğul olan Tofiqin hazırda 12 yaşı var. Azyaşlılar arasında ölkə miqyaslı turnirlərin qalibi və respublika birinciliyinin gümüş mükafatçısı olan cüdoçu indi növbəti respublika çempionatına hazırlaşır.
Hazırda Zaqatala şəhərindəki Cüdo Təlim Mərkəzi ilə yanaşı, rayonun bir neçə kəndində də bölmələr fəaliyyət göstərir. Suvagil kəndində 3, Muxax kəndində 1, Zaqatala Olimpiya İdman Kompleksində isə daha 1 məşqçi-müəllim uşaqlara bu idman növünün sirlərini aşılayır.
Bundan əlavə, rayonda müstəqil cüdo klubları da fəaliyyətini uğurla davam etdirir. Mosul kəndində, Əliabad qəsəbəsində, həmçinin rayon mərkəzində fəaliyyət göstərən “Turan” cüdo klubları buna əyani sübutdur. Bu şəbəkə tarixi ənənələrin Zaqatalada daha səmərəli və geniş miqyasda təbliğinə imkan yaradır. Ən başlıcası isə yeniyetmə və gənclər asudə vaxtlarını səmərəli keçirir, zərərli vərdişlərdən uzaq olurlar. Bu, sağlam və vətənpərvər gəncliyin yetişməsi üçün böyük zəmindir.
Beləcə, Əməkdar məşqçi Əfqan Rzayevlə bu idman növünün tarixi və perspektivləri barədə xeyli söhbətləşdik. Artıq Cüdo Təlim Mərkəzinin müəllim və idmançı heyəti ilə sağollaşmaq vaxtıdır. Zaldan xoş təəssüratlarla və növbəti uğurlar zamanı görüşmək ümidi ilə ayrılırıq. İnanırıq ki, yaxın gələcəkdə keçiriləcək yerli və beynəlxalq turnirlərdən Zaqatala idmançıları yenə yüksək nəticələrlə dönəcəklər. Biz isə Azərbaycan cüdo tarixinə “uğurlu zal” kimi düşən bu mərkəzdən yeni qələbə reportajlarımızı oxucularımıza təqdim edəcəyik.
Müxbir - Rasim İslamoğlu
Bölmənin digər xəbərləri
