Seymur Səfərli: Dövlət Proqramı çərçivəsində güzəştli kreditlər və faiz subsidiyaları nəzərdə tutulur VİDEO
Ağdaş, 12 iyun, AZƏRTAC
Əsas məqsədimiz regionlarda keçirilən müşavirələr vasitəsilə fermerlərin, sahibkarların, yerli icra hakimiyyətlərinin və aidiyyəti dövlət qurumlarının yeni Dövlət Proqramı barədə məlumatlandırılması, nəzərdə tutulan tədbirlərin yerlərə çatdırılması, kənd təsərrüfatının inkişafına yerində dəstəyin təmin olunmasıdır. Bu məqsədlə ilk müşavirələrdən biri Ağdaş rayonunda keçirildi. Müşavirədə fermerlərin, sahibkarların və dövlət qurumlarının iştirakı ilə kənd təsərrüfatının əsas prioritet istiqamətləri müəyyənləşdirildi, dövlət dəstək mexanizmləri barədə məlumat verildi.
Bu fikirləri AZƏRTAC-ın bölgə müxbirinə müsahibəsində Ağdaşda kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramının müzakirəsi ilə bağlı keçirilən regional müşavirədən sonra kənd təsərrüfatı nazirinin müavini Seymur Səfərli deyib.
Nazir müavini bildirib ki, əsas hədəflərdən biri də məhsuldarlığın artırılmasıdır. Xüsusilə buğda, ərzaqlıq buğda və pambıq istehsalında məhsuldarlığın yüksəldilməsi, intensiv kənd təsərrüfatının inkişafı - intensiv bağçılıq, istixana təsərrüfatları və intensiv heyvandarlıq prioritet istiqamətlər kimi müəyyən olunub. Məqsəd təkcə əkin sahələrinin genişləndirilməsi deyil, mövcud sahələrdə daha yüksək məhsuldarlığın əldə edilməsidir.
Üçüncü əsas istiqamət ixrac potensialının artırılması və emal sənayesinin inkişafıdır. Məhsulun tarladan son emal mərhələsinədək zəncir üzrə əlavə dəyər yaradılması və bunun ixrac imkanlarının genişləndirilməsi əsas prioritetlərdəndir. Nəticədə bu proseslər ölkənin ərzaq təhlükəsizliyinə, regionların sosial-iqtisadi inkişafına və fermer gəlirlərinin artmasına xidmət edəcək.
“Nazirlik çərçivəsində artıq işçi qrupları yaradılır. Bu qruplar regionlar üzrə fermer və sahibkarlarla birbaşa işləyəcək, onların layihələrini və investisiya planlarını dəqiqləşdirəcək, proqramla bağlı əməkdaşlıq mexanizmləri formalaşdıracaq. Eyni zamanda, yerlərdə yarana biləcək çətinliklərin operativ şəkildə həlli üçün yerli icra hakimiyyətləri və digər qurumlarla koordinasiya təmin ediləcək”, - deyə S.Səfərli vurğulayıb.
Onun sözlərinə görə, Dövlət Proqramı çərçivəsində güzəştli kreditlər və faiz subsidiyaları da nəzərdə tutulur.
Müxbir – Rəşad Türkoğlu
Bölmənin digər xəbərləri
