Qələbənin yetişdirdiyi ilk məzunlar: Xıdırlıda unudulmaz gün - FOTOLAR VİDEO
Ağdam, 13 iyun, AZƏRTAC
Ağdamın Xıdırlı kəndində yerləşən AYKOL MANAS adına tam orta məktəbdə tarixi gün yaşanıb. 33 illik fasilədən sonra məktəbdə yenidən "Son zəng" çalınıb və işğaldan azad olunmuş bu təhsil ocağı ilk məzunlarını həyata yola salıb.
AZƏRTAC-ın bölgə müxbiri xəbər verir ki, bu gün məktəbin həyətində yaşanan sevinc, qürur və kövrəklik hissləri bir-birinə qarışmışdı. Çünki məzun olan gənclər təkcə məktəblə vidalaşmır, həm də uzun illərin həsrətindən sonra doğma torpaqda yenidən başlanan həyatın ilk səhifələrini yazan nəslin nümayəndələri kimi tarixə düşürlər.
Məktəbin ilk məzunlarından olan Günay Zeynalovanın həyat yolu da bu qayıdışın simvoluna çevrilib. Atası Ağdamın Xıdırlı kəndində doğulub boya-başa çatsa da, işğal illərində doğma yurdundan didərgin düşüb. Günay isə Ağdamda doğulmasa da, ailəsinin xatirələri və söhbətləri, bu torpağın sevgisi ilə böyüyüb. O, Bakının Müşfiqabad qəsəbəsində yerləşən qaçqın şəhərciyində 10-cu sinfə qədər təhsil alıb. Ötən ildən etibarən ailəsi ilə birlikdə Ağdama qayıdaraq yenidən qurulan Xıdırlı məktəbində təhsilini davam etdirib. Bu gün isə işğaldan azad olunmuş Xıdırlı məktəbinin ilk məzunlarından biri kimi son zəng sevincini yaşayıb. "Mən burada doğulmasam belə, bu kənd, bu şəhər haqqında həmişə məlumatlarım olub. Ailəm mənə bu yerlərdən danışıb. Nə yaxşı ki, ötən ilin yay aylarında Ağdama köç etdik. Yeni məktəb, yeni dostlar mənim üçün maraqlı idi. Həm qürurvericidir, həm də bir az kədərlidir. Çünki bu, məktəbdə sonuncu ilimizdir", – deyə Günay bildirib.
Gələcək planlarından danışan məzun Qarabağ Universitetində coğrafiya müəllimliyi ixtisası üzrə təhsil almaq istədiyini bildirib. O, universiteti bitirdikdən sonra yenidən doğma məktəbinə qayıdaraq müəllim kimi fəaliyyət göstərməyi arzuladığını deyib.
İlk məzunlardan biri olan Əkbər Əmirlinin ailəsi də illərlə müxtəlif şəhər və rayonlarda məcburi köçkün həyatı yaşayıb. Əkbər 9-cu sinfə qədər Bakıda, 10-cu sinfi isə Göyçayda oxuyub. Ailəsinin Xıdırlıya qayıdışından sonra o, 11-ci sinfi doğma kənddə davam etdirib. "Bizim üçün böyük qürur hissidir ki, işğaldan azad olunmuş ərazilərin ilk məzunlarıyıq", – deyə Əkbər vurğulayıb.
Məzunlar məktəb illəri ilə vidalaşarkən, bu təhsil ocağının ilk fidanları olan birinci sinif şagirdləri isə həyatın yeni mərhələsinə qədəm qoyublar. Onlar doğma yurdda yenidən başlanan həyatın ən kiçik qəhrəmanları kimi bu tarixi günə şahidlik ediblər.
Tədbirdə iştirak edən birinci sinif şagirdləri məzunları şeirlər, mahnılar və rəngarəng çıxışlarla təbrik ediblər. Bayram ab-havası yaradan bu səhnələr sevinc dolu anlara çevrilib.
İbtidai sinif müəllimi Məlahət İbadova müsahibəsində bildirib ki, məlum hadisələr səbəbindən bu məktəbi tərk edəndə cəmi 28 yaşı olub və ibtidai sinif müəllimi kimi çalışıb. Bu gün isə 61 yaşında yenidən doğma məktəbinə qayıdaraq ilk birincilərə dərs deməyin qürurunu yaşayır.
"Fəxr edirəm, sevinirəm, çox şadlanıram ki, yenidən gəlib öz doğma məktəbimdə müəllimlik fəaliyyətimi davam etdirirəm. İlk birincilərə dərs deyirəm", – deyə Məlahət müəllim bildirib.
Tədbirdə Təhsil İnkişaf Fondunun İdarə Heyətinin sədri Nicat Məmmədli, Qarabağ Regional Təhsil İdarəsinin müdiri Sənan Mənsimli, həmçinin Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəliyinin əməkdaşı, Azərbaycan Milli Ordusunun ilk şəhidi Elbrus Hacıyevin qardaşı Elxan Hacıyev iştirak ediblər. Onlar çıxış edərək məzunları və valideynlərini bu əlamətdar gün münasibətilə təbrik edib, gələcək həyat yollarında uğurlar arzulayıblar.
Təhsilin İnkişafı Fondunun İdarə Heyətinin sədri Nicat Məmmədli bildirib ki, bu gün Xıdırlı məktəbinin 12 məzunu yeni həyata qədəm qoyur və onların hər biri gələcəkdə qürurla bu məktəbin ilk məzunları olduqlarını xatırlayacaqlar. "Ümid edirik ki, gələcəkdə Azərbaycanın layiqli vətəndaşları olacaq, ölkəmizin inkişafına öz töhfələrini verəcəklər", – deyə o qeyd edib.
Qarabağ Regional Təhsil İdarəsinin müdiri Sənan Mənsimli isə vurğulayıb ki, bu il Qarabağ regionu üzrə 6315 şagird məzun olub. İşğaldan azad edilmiş ərazilərdə fəaliyyət göstərən 18 ümumi təhsil müəssisəsində isə 128 məzun son zəng sevinci yaşayıb. "Xıdırlı kənd tam orta məktəbində 12 məzun, eyni zamanda 18 nəfər şagird birinci sinfi başa vurub", – deyə Sənan Mənsimli bildirib.
Tədbirdə məktəblilərin hazırladıqları şeirlər, mahnılar, eləcə də Qırğız rəqsi iştirakçılar tərəfindən böyük maraqla qarşılanıb. Bayram ab-havasında keçən çıxışlar tədbirə xüsusi rəng qatıb.
Məktəbin direktoru Mətanət Məmmədova bildirib ki, təhsil ocağı Qırğızıstan dövləti tərəfindən Azərbaycan dövlətinə və xalqına hədiyyə olaraq tikilib. "Məktəbimiz ikimərtəbəlidir. 2025–2026-cı tədris ilində fəaliyyətə sentyabrın 11-də 125 şagirdlə başlamışıq. Bu gün isə tədris ilini artıq 232 şagirdlə başa vururuq", – deyə direktor qeyd edib.
Və budur, həyəcanlı, kövrək, duyğulu, eyni zamanda sevinc dolu an yetişir. Məktəbin ilk məzunları sonuncu zəngin sədaları altında məktəbin həyətinə doğru qürurlu və inamlı addımlarla irəliləyirlər. Bu addımlar təkcə məktəb illəri ilə vidalaşmağın deyil, həm də doğma yurdda yenidən yazılan həyat hekayəsinin yeni mərhələsinə qədəm qoymağın rəmzinə çevrilir.
Beləliklə, Xıdırlı məktəbində 33 illik fasilədən sonra yenidən son zəng çalındı. Bu zəng təkcə bir tədris ilinin başa çatmasını deyil, illərlə həsrəti çəkilən doğma yurda qayıdışın, yenidən qurulan həyatın və gələcəyə olan inamın sədasını ifadə etdi. Bu gün məktəbin ilk məzunları uşaqlıq illəri ilə vidalaşaraq yeni həyata qədəm qoydular. Onların sevinci, həyəcanı və qüruru isə bu tarixi anın şahidi olan hər kəsin yaddaşında unudulmaz iz buraxdı.
Müxbir- Rəşad Türkoğlu
Bölmənin digər xəbərləri
