Hazır cavab insanın düşünmək qabiliyyətini əlindən alır – medalçı şagirddən süni intellektlə bağlı çağırış VİDEO
Bakı, 7 sentyabr, AZƏRTAC
Bir ailədə iki medal və bir müəllimin əməyi: Fizika, riyaziyyat və informatika təmayüllü liseyin 9-cu sinif şagirdi Ömər İbrahimov 7-ci sinifdə Respublika Fənn Müsabiqəsində I medal qazanıb. Onun bacısı da 6-cı sinifdə eyni müsabiqədə I medala layiq görülüb.
Ömər İbrahimov AZƏRTAC-a müsahibəsində olimpiada və fənn müsabiqələrinə xüsusi maraq göstərdiyini söyləyib. O, 7-ci sinifdə respublika fənn müsabiqəsində medal qazanaraq bu istiqamətdə ilk böyük uğurunu əldə edib. Ömər İbrahimovun sözlərinə görə, onun olimpiadalara marağının formalaşmasında müəlliminin böyük rolu olub: “Müəllimimi tanıyana qədər olimpiadalarla çox geniş məşğul olmamışdım. Ondan sonra bu sahə ilə daha ciddi məşğul oldum”.
Ömərin uğur hekayəsi ailəsində də davam edib. Onun bacısı 6-cı sinifdə respublika fənn müsabiqəsində medal qazanıb. Beləliklə, eyni ailədə iki uşağın bu uğura eyni müəllimin hazırlığı ilə nail olması diqqət çəkir. Ömər bildirir ki, riyaziyyat üzrə inkişaf etmək üçün uzun müddət ardıcıl çalışıb: “Riyaziyyatı öyrənmək üçün çox cəhd etmişəm. Dərslərim qurtarandan sonra vaxtımın böyük hissəsini olimpiadaya hazırlığa həsr etmişəm. Riyaziyyatı uşaqlıqdan yaxşı oxumuşam və bu fənlə məşğul olmaq mənim xoşuma gəlir. Ona görə də riyaziyyata daha çox vaxt ayırmışam. Amma digər fənləri də oxuyuram”.
Olimpiada iştirakçısı çətin məsələlərin həlli zamanı səbirli olmağın vacibliyini vurğulayır: “Çətin məsələ ilə qarşılaşanda əvvəlcə özüm həll etməyə çalışıram. Əgər alınmırsa, bir müddət həmin məsələni buraxıram. Bəzən heç gözləmədiyim anda, məsələn, gəzintidə olarkən sual yadıma düşür və həllini tapıram. Əgər yenə də həll edə bilmirəmsə, müəllimimdən soruşuram”.
Ömər süni intellektdən dərs və məsələ həllində istifadə ilə bağlı da fikirlərini bölüşüb: “Məncə, süni intellektdən məlumat almaq olar. Amma sualın hazır cavabını istəmək düzgün deyil. Çünki bu zaman insanın öz fikirlərini formalaşdırmaq və düşünmək qabiliyyəti zəifləyə bilər. İmtahanlarda isə süni intellekt olmur və sualları özümüz həll etməliyik”.
Həmsöhbətimiz yaşıdlarına sosial şəbəkələrdən istifadəyə də diqqətli yanaşmağı tövsiyə edir: “Sosial şəbəkələrə uzun müddət baxmaq insan üçün faydalı deyil. Bunun əvəzinə həyətdə oynamaq, gəzmək, kitab oxumaq və dərs üzərində çalışmaq daha yaxşıdır”.
Ömər təhsil və hazırlıq prosesində internet resurslarından da faydalandığını qeyd edir. “Yutubdan daha çox yararlanmışam. Orada müxtəlif mövzularla bağlı incəliklər, maraqlı suallar qarşıma çıxıb. Əsas məqsədim müxtəlif sualları görmək, onların üzərində düşünmək və yeni yanaşmalar öyrənmək olub”.
Həmsöhbətimiz hesab edir ki, gənclərin uğur qazanması üçün əsas amillərdən biri davamlı çalışmaq və təhsilə ciddi yanaşmaqdır: “Çox oxusaq, gələcəkdə daha böyük uğurlar əldə edə bilərik. Təhsil insanın daha yaxşı peşə seçməsinə və daha yaxşı düşüncələrə sahib olmasına kömək edir. Məqsədə çatmaq üçün yalnız istedad deyil, həm də zəhmət, səbir və davamlı çalışma vacibdir”.
Ömərin ilk uğurları isə gələcəkdə daha böyük nəticələr qazanmaq üçün motivasiya rolunu oynayır.
Bölmənin digər xəbərləri
