ELM VƏ TƏHSİL
Nilu Raşidova: Azərbaycan artıq bütün dünyada tanınır VİDEO
Bakı, 6 aprel (AZƏRTAC). Azərbaycan artıq bütün dünyada tanınır. İdmançılarınızın olimpiada və digər nüfuzlu yarışlarda qazandığı medallar, mədəniyyət və incəsənət xadimlərinizin beynəlxalq tədbirlərdəki unudulmaz çıxışları dünya ictimaiyyətində ölkəniz haqqında zəngin məlumatlar formalaşdırmışdır.
Bu sözləri “Kaspi” Təhsil Mərkəzi tərəfindən Bakıda keçirilən VI Beynəlxalq təhsil sərgisinin iştirakçısı, Böyük Britaniyanın Norviç şəhərində yerləşən “East Anglia” Universitetinin (UEA) nümayəndəsi Nilu Raşidova AZƏRTAC-a müsahibəsində demişdir.
O bildirmişdir ki, Bakıda Asiya və Avropanın ən gözəl dəyərləri təcəssüm olunur. Şəhərin memarlığı göz oxşayır. Həm qədim, həm də müasir tikililər yüksək zövqlə inşa olunmuşdur. İnsanlarınız mehriban, səmimi və qonaqpərvərdirlər.
Təmsil etdiyi universitetin “Kaspi” Təhsil Mərkəzi ilə sıx əməkdaşlığından söhbət açan Nilu Raşidova vurğulamışdır ki, hər il bu sərgidə azərbaycanlıların xarici ölkələrdə, xüsusilə də İngiltərədə təhsil almağa maraqlarının artdığını müşahidə edir.
Diqqətə çatdırmışdır ki, “East Anglia” Universitetində azərbaycanlı tələbələrin cəmiyyəti - Azərbaycan Assosiasiyası fəaliyyət göstərir. Bu tələbələr ölkənizi mütəmadi təqdim edirlər. Belə təqdimatların nikbin ruhu onların xoşbəxt bir ölkənin vətəndaşları olduqlarını bir daha təsdiqləyir.