73 yaşlı tələbə: Gənclik arzum gözümdə qalmadı FOTO VİDEO
Qəbələ, 12 mart, AZƏRTAC
Bu il Qəbələ Dövlət Peşə Təhsil Mərkəzi nəzdində ölkə üzrə ilk dəfə “Arıçı” ixtisası fəaliyyətə başlayıb. Həmin qrupa sənəd verib qəbul olunanlardan biri də 73 yaşlı Musa Mahmudovdur.
AZƏRTAC-ın əməkdaşı Azərbaycanın ən yaşlı tələbəsi olan Musa Mahmudov ilə görüşüb.
Qəbələ Dövlət Peşə Təhsil Mərkəzində min nəfərə yaxın tələbə təhsil alır. Bu il onların sırasına daha bir tələbə qatılıb, onun nə az, nə çox, 73 yaşı var. Bu, Vəndam qəsəbə sakini Musa Mahmudovdur. Bir neçə aydır ki, o da hamı kimi səhər tezdən dərsə gəlir.
Peşə Təhsil Mərkəzində bu il fəaliyyətə başlayan “Arıçı” ixtisasına ən son anda sənəd verərək qəbul olunan Musa Mahmudov yaşına baxmayaraq, dərslərə intizamla yanaşır, verilən tapşırıqları yerinə yetirir, nəzəri və praktiki dərslərdə fəallığı ilə seçilir.
Arıçı-tələbələr nəzəri dərsləri başa vurandan sonra emalatxanaya yollanırlar. Onlar burada arıçılıqla bağlı müxtəlif avadanlıqlar və onlardan istifadə qaydaları haqda məlumat alırlar.
Üç qız, bir oğul atası olan Azərbaycanın ən yaşlı tələbəsi Musa Mahmudovun 8 nəvəsi var. Deyir ki, övladlarının hamısına ali təhsil verib. Özü də vaxtı ilə təhsil almaq istəsə də, ailəsinin maddi imkanı buna mane olub. İndi isə özünün gənclik arzusunu reallaşdırır.
“Mən 20 ilə yaxındır arıçılıqla məşğulam. Amma bu məktəbə gələndən sonra bildim ki, çox şeyi bilmirəm. İndi mən Səbuhi müəllim, Anar müəllim, Elşən müəllimdən - əsas arıçı müəllimlərimdən öyrənirəm. Nə yaxşı ki, Peşə Təhsil Mərkəzinə sənəd verdim. Həm gənclik arzum gözümdə qalmadı, həm də maraqlı peşəyə sahib olacağam”, - deyə o bildirir.
Dərslərə davamiyyətdə heç kimdən geri qalmayan, özünü intizamlı aparan tələbə Musa Mahmudov müəllimlərinin gənc olmasına rəğmən ancaq öyrənmək barədə düşünür. Peşə Təhsil Mərkəzinin müəllimi, Qəbələ Arıçılar Birliyinin rəhbəri Anar Məmmədov deyir ki, bu ixtisasda təhsil alanlara təkcə arıçılığın sirri deyil, həm də marketinq məsələləri, bazarlama və satışın təşkili istiqamətində də təlim və dərslər keçilir.
Qəbələ Dövlət Peşə Təhsil Mərkəzinin direktoru Qalib Nəbiyev bildirir ki, Mərkəzdə 32 ixtisas və 57 qrup fəaliyyət göstərir. Arıçı ixtisasına gəldikdə, ilk qəbul ili olmasına baxmayaraq, 40-dan artıq müraciət daxil olmuşdu. Lakin 19 nəfər tələbə adına layiq görüldü. Qalib Nəbiyev 73 yaşlı tələbəyə gəlincə, qeyd etdi ki, Musa Mahmudov həm də peşə təhsil sahəsinə olan stereotipləri dağıtdı. Yəni, hansı yaşda desən, oxumaq, öyrənmək və peşəyə sahib olmaq mümkündür.
“Arıçılıq ixtisasına təkcə bəylərin deyil, xanımların da marağı artıb. Növbəti qəbul ilində xanım arıçılara 20-30 faiz yer ayırmağı düşünürük. Digər tərəfdən gələcəkdə bu ixtisasda təhsil alacaq xanım arıçılara bir çox şirkətlər tərəfindən arıçılıq avadanlıqlarının verilməsi ilə bağlı razılıq da əldə olunub. Düşünürəm ki, bu, arıçılığın inkişafına dəstək olmaqla yanaşı, həm də arıçılığın təşviqinə imkan yaradacaq”, - deyə Qalib Nəbiyev qeyd edir.
Peşə Təhsil Mərkəzinin direktoru onu da diqqətə çatdırır ki, minə yaxın tələbənin təlim-tərbiyəsi ilə 105 nəfər mühəndis-pedaqoq məşğul olur. Qarşıdakı aylarda digər ixtisaslar kimi “Arıçı” qrupunda təhsil alan tələbələr də Türkiyədən gələn mütəxəssislərlə birgə təlim və proqramlara cəlb olunacaqlar.
Bölmənin digər xəbərləri
