Dövlət Sərhəd Xidməti Akademiyası məzunlarının buraxılışına həsr olunmuş təntənəli mərasim keçirilmişdir VİDEO
Bakı, 11 iyul (AZƏRTAC). İyulun 11-də Dövlət Bayraq Meydanında Dövlət Sərhəd Xidməti (DSX) Akademiyası məzunlarının buraxılışına həsr olunmuş təntənəli mərasim keçirilmişdir.
AZƏRTAC xəbər verir ki, DSX-nin nümunəvi hərbi orkestrinin ifasında dövlət himni səsləndirildikdən sonra məzunlara diplomlar təqdim olunmuşdur.
DSX Akademiyasının döyüş bayrağı meydana gətirilmiş, Xidmətin zabit sıralarına daxil olan gənc leytenantlar “Sərhədçi andı” içmişlər.
Tədbirdə gənc zabitlər adından çıxış edən leytenant Azər Gözəlov çətin, lakin şərəfli sərhədçi peşəsini seçmələrindən qürur duyduqlarını, qarşılarına qoyulmuş tapşırıqları şərəflə yerinə yetirməyə daim hazır olduqlarını bildirmişdir. O, Vətənə ləyaqətlə xidmət edəcəklərinə, dövlət sərhədlərimizi göz bəbəyi kimi qoruyacaqlarına söz vermişdir. Gənc leytenant sərhədçi peşəsinin sirlərinə dərindən yiyələnməkdə, Akademiyanı uğurla başa vurmaqda əməyini əsirgəməyən zabit və müəllim heyətinə dərin minnətdarlığını bildirmişdir.
Akademiyanın rəisi, general-mayor Araz Məmmədov 2007-ci il iyunun 12-də Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Dövlət Sərhəd Xidməti Akademiyasının yaradılması barədə Sərəncamının Vətənimizin sərhədlərinin etibarlı mühafizəsinin təkmilləşdirilməsində mühüm rol oynadığını diqqətə çatdırmışdır. O, kursantların təlim-tədrisi ilə yüksək səviyyədə məşğul olmaq üçün müasir tələblərə cavab verən Akademiyanın açılış mərasimində Prezident İlham Əliyevin iştirak etməsini qürur hissi ilə xatırlatmışdır.
A.Məmmədov demişdir ki, bu gün zabit rütbəsi alan gənclərdən üçü Akademiyanı fərqlənmə diplomu ilə bitirmişdir.
Dövlət Sərhəd Xidmətinin rəisi - Sərhəd Qoşunlarının komandanı, general-leytenant Elçin Quliyev vətənpərvərliyi və Ali Baş Komandana sadiqliyi ilə seçilən DSX-nin zabit heyətinə qəbul olunmaları münasibətilə gənc leytenantları təbrik etmiş, onlara xidmətdə uğurlar arzulamışdır. Elçin Quliyev yaradıcısı ulu öndər Heydər Əliyev olan DSX-də dövlətimizin başçısı İlham Əliyevin diqqət və qayğısı sayəsində sərhədçilər üçün yaradılmış yüksək şərait, əldə edilmiş xidməti nailiyyətlər barədə məlumat vermişdir.
DSX rəisi hər bir sərhədçi kimi, gənc zabitlərin də dövlətçilik ənənələrinə sadiq olacaqlarına, sərhədlərimizin etibarlı mühafizəsi naminə əzmlə xidmət edəcəklərinə, Azərbaycan sərhədçisi adını daim uca tutacaqlarına əminliyini bildirmişdir.
Akademiyanın şəxsi heyəti təntənəli marşın sədaları altında tribuna önündən keçmişdir.
Sonra Dövlət Bayrağı Muzeyində general-leytenant Elçin Quliyev Akademiyanı fərqlənmə diplomu ilə başa vurmuş gənc zabitlərə qiymətli hədiyyələr, fəxri diplomlar təqdim etmiş, məzunlarla xatirə şəkilləri çəkdirmişdir.
Daha sonra gənc zabitlər Fəxri xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini ehtiramla yad etmiş, məzarı önünə gül dəstələri qoymuşlar.
Görkəmli oftalmoloq alim, akademik Zərifə xanım Əliyevanın da xatirəsi anılmış, məzarı üzərinə güllər düzülmüşdür.
Şəhidlər xiyabanına gələn gənc zabitlər ölkəmizin azadlığı və suverenliyi uğrunda mübarizədə şəhid olmuş qəhrəman Vətən övladlarının xatirəsini ehtiramla yad etmiş, məzarları üzərinə tər çiçəklər düzmüşlər.
Bölmənin digər xəbərləri
