Ermənistan Xocalı soyqırımına görə daşıdığı beynəlxalq hüquqi məsuliyyəti etiraf etməlidir VİDEO
Bakı, 24 fevral, AZƏRTAC
Xocalıda Ermənistan tərəfindən soyqırımı, insanlıq əleyhinə cinayət və hərbi cinayətlər törədilib. Ermənistan Xocalı soyqırımına görə daşıdığı beynəlxalq hüquqi məsuliyyəti etiraf etməlidir.
AZƏRTAC xəbər verir ki, bu fikirləri Xarici İşlər Nazirliyinin mətbuat xidmətinin rəhbəri Hikmət Hacıyev fevralın 24-də Xocalı soyqırımı ilə bağlı keçirdiyi mətbuat konfransında deyib.
H.Hacıyev bildirib ki, Xocalı soyqırımı xüsusilə şahidlərin ifadəsi, beynəlxalq təşkilatlar, QHT və KİV materialları vasitəsilə tam şəkildə sənədləşdirilib. Bu əsasda Ermənistanın məsuliyyəti danılmazdır.
Qeyd edilib ki, Avropa İnsan Hüquqları Məhkəməsinin 2010-cu il 22 aprel tarixli qərarında Xocalıda törədilmiş əməllər “xüsusilə ağır hallar olaraq, hərbi cinayət və ya insanlıq əleyhinə cinayət” kimi qiymətləndirilib.
Ermənistan Respublikası beynəlxalq hüquqi öhdəliklərinə rəğmən Xocalı soyqırımının törədilməsi ilə beynəlxalq humanitar hüququ və insan hüquqlarına aid fundamental sənədləri, o cümlədən üzv olduğu “Soyqırımı cinayətlərinin qarşısının alınması və cəzalandırılması haqqında” Konvensiyanı kobudcasına pozub. Ermənistan irqi, etnik, milli və dini ayrı-seçkilik zəminində əvvəlcədən planlaşdırılmış şəkildə Xocalı sakinlərinin soyqırımı məqsədilə fiziki məhv edilməsi əməllərini həyata keçirib. Xocalıda törədilmiş bu cinayətə görə Ermənistan məsuliyyət daşıyır. Beynəlxalq hüquqa əsasən bu kimi əməllərə görə dövlətlərin məsuliyyəti ilə bərabər fərdlərin də məsuliyyəti aydın şəkildə müəyyən olunub. Ona görə də hərbi-siyasi rəhbərliyində olan və Xocalı soyqırımının həyata keçirilməsində iştirak etmiş şəxslər fərdi cinayət məsuliyyəti daşıyırlar. Ermənistan Xocalı soyqırımına görə daşıdığı beynəlxalq hüquqi məsuliyyəti etiraf etməli, Azərbaycan xalqından üzr istəməli və cinayətkarlar cəzalandırılmalıdırlar.
Vurğulanıb ki, bu cinayəti törədənlərin cəzasızlığı və Xocalı qurbanlarına münasibətdə ədalətin təmin olunmaması Ermənistan-Azərbaycan münaqişəsinin həll olunmasına maneə yaradan ciddi səbəblərdəndir. Münaqişənin həlli prosesində beynəlxalq humanitar hüquq və insan hüquqlarının kobud şəkildə pozulması hallarına münasibətdə həqiqətin ortaya qoyulması və ədalətin təntənəsi, bu kimi əməllərin qurbanı olmuş şəxslərə təzminatların verilməsi, cinayətkarların cəzalandırılması və gələcəkdə belə halların qarşısını almaq üçün təsisatlanmış mexanizmlərin müəyyən edilməsi olduqca vacibdir.
Mətbuat katibi diqqətə çatdırıb ki, Xocalı qətliamının insanlıq əleyhinə cinayət və soyqırımı kimi tanınması və pislənilməsi istiqamətində mühüm uğurlu işlər görülüb. Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət!” kampaniyası çərçivəsində dünya miqyasında effektiv ictimai məlumatlandırma həyata keçirilir.
H.Hacıyev, həmçinin bildirib ki, Xarici İşlər Nazirliyinin jurnalı olan “Diplomatiya Aləmi” jurnalının xüsusi buraxılışı “Xocalı soyqırımı: 26 fevral 1992-ci ildə Xocalıda törədilmiş cinayətin pislənilməsinə dair rəsmi sənədlər” adı altında dərc edilib.
Bölmənin digər xəbərləri
