Ümummilli Liderin xatirəsinə həsr edilən tədbirdə məşhur amerikalı diplomata fəxri lövhə təqdim olunub VİDEO
Vaşinqton, 12 may, AZƏRTAC
Xalqımızın ümummilli lideri Heydər Əliyevin anadan olmasının 93-cü ildönümü münasibətilə Azərbaycanın Vaşinqtondakı səfirliyində tədbir keçirilib.
Tədbirdə Vaşinqtondakı diplomatik korpusun nümayəndələri, o cümlədən Türkiyənin ABŞ-dakı səfiri Sərdar Kılıç, Qazaxıstan, Qırğızıstan, Gürcüstan və Rumıniyanın yüksək rütbəli diplomatları, ABŞ Dövlət Departamenti və Ticarət Nazirliyinin rəsmiləri, eləcə də yerli ictimai təşkilatlar və ABŞ-dakı Azərbaycan icmasının nümayəndələri iştirak ediblər. Tədbirin fəxri qonağı ABŞ Dövlət Departamentinin sabiq yüksək rütbəli rəsmisi, səfir Riçard Hoqland olub.
Səfir Elin Süleymanov tədbirdə müasir Azərbaycan dövlətinin memarı olan Heydər Əliyevin rəhbərliyi altında ölkəmizin keçdiyi inkişaf yolu barədə məlumat verib, bu gün güclü və beynəlxalq səviyyədə etibarlı tərəfdaş kimi tanınan Azərbaycanın məhz onun yorulmaz səyləri nəticəsində formalaşdığını vurğulayıb. Səfir, həmçinin Ümummilli Liderin ABŞ ilə ikitərəfli münasibətlərin inkişafı və regional əməkdaşlığa verdiyi əvəzolunmaz töhfələr barədə danışıb və bunun münasibətlərimiz üçün möhkəm zəmin yaratdığını qeyd edib.
Diplomat qədim İpək yolunun bərpası istiqamətində Azərbaycanın ABŞ və digər tərəfdaş ölkələrlə birgə göstərdiyi səylərin əhəmiyyətindən söz açıb və ümummilli lider Heydər Əliyevin şəxsi iradəsi və təşəbbüsü ilə 1998-ci ildə Bakıda baş tutmuş “Avropa-Qafqaz-Asiya Nəqliyyat Dəhlizi” (TRACECA) üzrə beynəlxalq konfransın tarixi əhəmiyyətini xüsusi vurğulayıb. Riçard Hoqlandın regionumuzdan keçən tarixi İpək yolunun gerçəkləşməsinə verdiyi töhfələrə istinad edən Elin Süleymanov ona minnətdarlığını bildirib. O, ötən il Azərbaycan səfirliyində Trans-Xəzər ticarət və nəqliyyat dəhlizinin inkişafı üzrə regional əməkdaşlığın potensialına dair diplomatik seminarın keçirilməsi və daha sonra cari ilin aprelində Vaşinqtonda eyni mövzuya həsr olunmuş beynəlxalq forumun təşkilinə Riçard Hoqlandın göstərdiyi dəyərli dəstəyi təqdir edib. Səfir ümummilli lider Heydər Əliyevin doğum gününün qeyd olunması çərçivəsində Riçard Hoqlanda ABŞ-Azərbaycan tərəfdaşlığının inkişafı və tarixi İpək yolunun canlandırılmasına yetirdiyi töhfələrə görə fəxri lövhə təqdim edib.
Riçard Hoqland ona göstərilən etimada görə təşəkkürünü bildirib və ölkəmizlə bağlı şəxsi təəssüratlarını bölüşüb. Bu təəssüratlara əsaslanaraq o, ölkəmizi və Azərbaycan xalqını açıqürəkliliyi, qonaqpərvərliyi və xoşniyyətliliyi ilə xarakterizə edib. Amerikalı diplomat konkret olaraq 2001-ci il sentyabrın 11-də ABŞ-da dəhşətli terror aktlarının baş verdiyi gündə yolunun üstündə yerləşmiş Azərbaycanın Vaşinqtondakı səfirliyinin onun dadına çatdığını xatırladıb.
Səfirlik tərəfindən hər il ümummilli lider Heydər Əliyevlə bağlı təşkil edilən tədbirdə ənənəvi olaraq Azərbaycan-ABŞ strateji tərəfdaşlığına töhfə vermiş ABŞ-ın tanınmış xadimlərinə fəxri lövhə təqdim olunur. Belə ki, daha öncə eyni mükafat ilə ABŞ Konqresinin sabiq üzvü Dən Börtn və ABŞ Nəqliyyat Komandanlığının sabiq rəhbəri, hərbi hava qüvvələrinin 4 ulduzlu generalı Danken Maknab təltif olunublar.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
