SİYASƏT
Deputat: Sərhəd-buraxılış məntəqəsinin açılması qanunsuz separatçı birləşmələrin silahlanmasına imkan verməyəcək
Bakı, 24 aprel, AZƏRTAC
Azərbaycan sərhəd qoşunlarının Laçın-Xankəndi yolunun başlanğıcında sərhəd-buraxılış məntəqəsinin açılması çox mühüm əhəmiyyət kəsb edən tarixi məsələdir. 1988-ci ildən başlayaraq erməni təcavüzü və təxribatı nəticəsində Qarabağ istiqamətinə silah və sursatın daşınması, hərbi birləşmələrin gətirilməsi üçün bu yollardan istifadə olunurdu.
Bunu AZƏRTAC-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev bildirib.
Deputat qeyd edib ki, 10 noyabr 2020-ci il kapitulyasiya aktına istınadən Azərbaycan tərəfi ermənilər üçün mühüm yol hesab olunan Laçın dəhlizindən istifadəyə icazə vermişdi. Amma bunlar bu yoldan silahların daşınması üçün istifadə edirdilər. Arzu Nağıyev əlavə edib ki, Laçın-Xankəndi yolunda sərhəd-buraxılış məntəqəsinin qurulması məğlub ölkənin çirkin niyyətlərinin qarşısını almağa hesablanıb.
Milli Məclisin komitə üzvü vurğulayıb ki, Ermənistan və Azərbaycan arasında sərhədlərin delimitasiya və demarkasiyası aparılmasa, sərhədlər hələ ki, şərti xarakter daşısa da, Laçın-Xankəndi yolu humanitar məqsədlərə açıqdır. Həmin yoldan üçtərəfli Bəyanatda müəyyən edilən məqsədlərdən kənar formada, Ermənistan və qanunsuz erməni hərbi birləşmələri tərəfindən hərbi məqsədlər üçün istifadə edilir, Qarabağa silah, mina və canlı qüvvə daşıyırdılar. Onun sözlərinə görə, sərhəd-buraxılış məntəqəsinin açılması Azərbaycan ərazilərinə Ermənistan tərəfindən daxil olan istənilən yüklərin qanun çərçivəsində yoxlanılmasına imkan verəcək. Bu da ərazilərimizdəki qanunsuz separatçı birləşmələrin silahlanmasına imkan verməyəcək.
Arzu Nağıyev qeyd edib ki, sərhəd-buraxılış məntəqəsinin qurulması tələbini Prezident İlham Əliyev Münxen Təhlükəsizlik Konfransı çərçivəsində bildirib və bu təşəbbüs konstruktiv, regionda sülhün, təhlükəsizliyin, sabitliyin əldə olunmasında önəmli bir addım kimi qiymətləndirilir. Bu səbəbdən də Azərbaycanın Həkəri çayı üzərində Ermənistanla Laçın rayonunu birləşdirən kommunikasiya xəttində sərhəd-buraxılış məntəqəsini qurması ədalətlidir, beynəlxalq hüquqa söykənir, Azərbaycanın suveren hüququdur.