SİYASƏT
“Qaradağlı soyqırımı şahidlərin dili ilə” kitabının təqdimatı keçirilmişdir
Xocavənd, 14 fevral (AZƏRTAC). “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin mərkəzi qərargahında Milli Məclisin deputatı Qənirə Paşayeva və Xocavənd Rayon İcra Hakimiyyətinin əməkdaşı Şaiq Aslanov tərəfindən hazırlanmış “Qaradağlı soyqırımı şahidlərin dili ilə” kitabının təqdimat mərasimi keçirilmişdir.
AZƏRTAC xəbər verir ki, mərasimdə çıxış edən Ş.Aslanov kitab haqqında məlumat vermişdir. Bildirmişdir ki, Qaradağlı soyqırımı şahidlərinin, ermənilərin əsir və girovluğunda amansız işgəncələrə məruz qalmış sakinlərin acı xatirələrinin yer aldığı kitabda soyqırımı dəhşətlərini, erməni terrorunu əks etdirən foto-faktlar, həlak olan, əsir və girov götürülən Qaradağlı sakinlərinin siyahısı verilmişdir. Kitabın baş məsləhətçi Xocavənd Rayon İcra Hakimiyyətinin başçısı Eyvaz Hüseynov və Milli Məclisin deputatı, tarix elmləri doktoru Musa Qasımlı, redaktoru Əkbər Qoşalıdır. Milli Məclisin deputatları Qənirə Paşayeva, Elman Məmmədov, Musa Qasımlı, Xarici İşlər Nazirliyinin əməkdaşı Elman Abdullayev, “Azərbaycan Respublikası Dağlıq Qarabağ bölgəsinin Azərbaycanlı İcması” İctimai Birliyinin əlaqələndirmə şurasının sədri Orxan Əkbərov, Türkiyə Böyük Millət Məclisinin üzvü Sinan Oğan, tarixçi alim Məhərrəm Zülfüqarlı, Xocavənd Rayon İcra Hakimiyyətinin başçısı Eyvaz Hüseynov və başqaları mərasimdə çıxış edərək Ermənistan ordusunun Xocavənd rayonunun Qaradağlı kəndində törətdikləri soyqırımı ilə bağlı yazılmış kitabın informasiya mübadiləsi və mübarizəsində ermənilərə qarşı tutarlı cavab, Azərbaycan həqiqətlərinin dünyaya çatdırılması istiqamətində mühüm vəsait olacağını bildirmişlər. Qeyd olunmuşdur ki, “Qaradağlı soyqırımı şahidlərin dili ilə” kitabı yaxın vaxtlarda digər əcnəbi dillərə də tərcümə olunacaqdır.