"Azəriqaz"ın rəsmisi: Qazlaşdırılmayan yaşayış məntəqələri 900-ə yaxın kəndi əhatə edir
Bakı, 14 noyabr, Nailə Həsənova, AZƏRTAC
Cari ildə 9 kəndin və 15 yeni yaşayış massivinin qazlaşması tamamlanıb, 12 kənddə və 2 massivdə qazlaşma işi davam edir.
Bunu AZƏRTAC-a məxsusi açıqlamasında "Azəriqaz" İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev bildirib.
Onun sözlərinə görə, qazlaşdırılmayan yaşayış məntəqələri isə respublikanın müxtəlif bölgələrində 900-ə yaxın kəndi əhatə edir: “Bunlardan bir qisminin coğrafi mövqeyinə, ev sayına və qaz təchizatı mənbələrindən uzaq məsafədə yerləşməsinə görə qazlaşdırılması texniki-iqtisadi cəhətdən səmərəsiz kimi qiymətləndirilir. İstehsalat Birliyi maliyyə imkanları çərçivəsində hər il respublikanın müxtəlif bölgələrində müəyyən sayda kənd və massivlərin qazlaşması işlərini davam etdirir. Birlik tərəfindən daşıyıcı və paylayıcı küçə qaz kəmərləri çəkilir ki, bunun nəticəsində əhalinin qaz infrastrukturuna əlçatanlığı təmin edilmiş olur. Paylayıcı küçə qaz xətləri çəkilikdən sonra vətəndaşlar fərdi qaydada "ASAN xidmət" mərkəzlərinə müraciət etməklə öz hesablarına daxili qazlaşmanı həyata keçirirlər. Lakin daha çox sayda kənd və massivlərin qazlaşdırılması üçün əlavə maliyyə resursları tələb olunur”, - deyə o diqqətə çatdırıb.
Qeyd edək ki, istiliklə bağlı müvafiq qurumlar tərəfindən qışa hazırlıqla əlaqədar həyata keçirilən tədbirlərlə daha ətraflı link vasitəsilə tanış ola bilərsiniz.
Bölmənin digər xəbərləri
