ABŞ-A QUL QİSMİNDƏ HƏR İL 17,5 MİNƏ QƏDƏR ADAM GƏTİRİLİR

20.05.2004 [00:01]
Çap et
A⁺ A^-

AZƏRTAC-ın Vaşinqtondan aldığı xəbərə görə, cinayətkar qruplar hər il ABŞ-a qul qismində hər il 14,5 mindən 17,5 minədək adam gətirirlər. Bu məlumat ABŞ Ədliyyə Nazirliyinin Konqresə təqdim etdiyi məruzədə əksini tapmışdır. Məlumatda vurğulanır ki, “canlı əmtəə” ilə beynəlxalq alverin qurbanları, adətən, qanunsuz seks sənayesinə, işlər həddindən artıq ağır olan müəssisələrə və emalatxanalara düşür, habelə onlardan ev qulluqçusu kimi istifadə edirlər. Sənəddə deyilir: “Köləliyin 130 il bundan əvvəl qanunla qadağan edildiyi Birləşmiş Ştatlarda belə faciəli fenomen olmamalıdır. Bununla belə, bu, mövcuddur”.

2000-ci ildə ABŞ-da insan alverinə görə cəzanı sərtləşdirən yeni qanun qəbul edilmişdir. Konqres hökumətin qarşısında bu qanunun yerinə yetirilməsinin təmin olunması barədə hesabat vermək vəzifəsi qoymuşdur. Ədliyyə Nazirliyinin məruzəsi qanunvericilərin tələbinə cavabdır.

Sənəddə bildirilir ki, ABŞ-ın hüquq mühafizə orqanları aprel ayınadək qul alverində təqsirləndirilən şəxslər barəsində 153 cinayət işi qaldırmışlar. Bu, 2001-ci ildəkindən iki dəfə çoxdur. 2001-ci ilin yanvarından bu il mayın ortalarınadək ABŞ-ın hakimiyyət orqanları insan alverində iştirak etmiş 78 cinayətkar barəsində ittiham hökmü çıxarılmasına nail olmuşlar.

ABŞ Milli Təhlükəsizlik Nazirliyinin immiqrasiya və gömrük xidmətinin rəisi Con Torres Kapitolidəki dinləmələrdə çıxışında bildirmişdir ki, müxtəlif ölkələrin mütəşəkkil cinayət qruplaşmaları qul alverindən ildə təxminən 9,5 milyard dollar qazanc götürürlər.

ABŞ-A QUL QİSMİNDƏ HƏR İL 17,5 MİNƏ QƏDƏR ADAM GƏTİRİLİR

MÜƏLLİFLƏ ƏLAQƏ

Bölmənin digər xəbərləri