ABŞ Azərbaycanın suverenliyini təmin etməsindən narahatdır ŞƏRH
Bakı, 8 oktyabr, AZƏRTAC
Cəbrayıl işğaldan azad olunmuş digər rayonlar, şəhərlər kimi özünün inkişaf dövrünü yaşayır. Dövlətimizin başçısının işğaldan azad olunmuş ərazilərə səfərləri ermənilərin 30 ildə viran qoyduğu şəhər və kəndlərin yenidən qurulub bərpa edilməsini və keçmiş məcburi köçkünlərin öz doğma yurdlarına qayıtmasını sürətləndirir. Oktyabrın 4-də Prezident İlham Əliyev Cəbrayıla növbəti səfəri çərçivəsində yaşayış kompleksinin açılışını etdi. Səfərlərdə məqsəd müharibədən sonra bölgənin infrastrukturunu gücləndirmək, sosial-iqtisadi vəziyyətini yaxşılaşdırmaq və uzun illər məşəqqətli həyat sürmüş keçmiş məcburi köçkünlərin həyat şəraitini yüksəltməkdir. Ölkə Prezidenti həm də regionun tarixi və mədəni irsinin qorunmasına həssas yanaşır. Bu cür səfərlər dövlətin işğaldan azad olunmuş ərazilərə böyük diqqətinin nümayişidir.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, Cəbrayıl sakinləri ilə görüşdə geniş nitqlə çıxış edən Prezident İlham Əliyev həm də Ermənistanı silahlandıraraq regionda vəziyyəti yenidən gərginləşdirməyə çalışan dairələrə də vacib mesajlar verdi. Məlumdur ki, ABŞ hazırda açıq şəkildə ölkəmizə qarşı Azərbaycanofob və İslamofob siyasətini davam etdirir. O zaman bu mesajlardan ABŞ da öz payını götürməlidir.
Azərbaycan beynəlxalq hüququn pozulmasından ən çox əziyyət çəkən ölkələrdəndir. Torpaqlarımızın işğal altında olduğu 30 ildə ABŞ və Fransa Azərbaycanın işğalla barışmasına və alçaldıcı sülhə razılaşmasına çalışırdı. Ermənistan işğal illərində 300-dən çox yaşayış məntəqəmizi yerlə-yeksan edib, milli-mədəni irsimizi yer üzündən silərək bir milyon azərbaycanlını öz yurdlarından qaçqın və məcburi köçkün salanda ABŞ haqq səsimizə dəstək vermək əvəzinə ölkəmizə sanksiyalar tətbiq edərək işğalçı və cinayətkarlara heç bir təzyiq göstərmədi. Münaqişənin sülh vasitəsilə tənzimlənməsi üçün yaradılan ATƏT-in Minsk qrupu 28 ildə BMT Təhlükəsizlik Şurasının qətnamələrini icra etdirmək əvəzinə siyasi teatr səhnələri quraşdıraraq pozulmuş hüquqlarımızın bərpası istiqamətində heç bir iş görmədi.
“ABŞ-ın Dövlət katibi bir yandan Azərbaycan-Ermənistan sülh müqaviləsinin tezliklə imzalanmasına çağırışlar edir, bir yandan da Amerika Dövlət Departamentinin Dövlət katibinin təşəbbüsü ilə Konqresin 60 üzvü ölkəmizə növbəti sanksiyalar tətbiq etmək üçün hökumətə müraciət edir. Bu da ABŞ-ın nə qədər riyakar və ikiüzlü olduğunu göstərir. Suveren ərazilərini işğaldan qurtarıb, ermənilərin viran qoyduqları yerləri bərpa edib uzun illər çətin məcburi köçkünlük həyatını yaşamış insanların öz yurdlarına qaytarılması nə vaxtdan hüququn pozulması olub? Əgər suveren ərazilərin azad edilməsi cinayətdirsə, niyə Ukraynaya silahlar verilir və Rusiya ağır sanksiyalara məruz qalır? ABŞ ölkələrin ərazi bütövlüyünün pozulmasını qəbuledilməz saysa da, Azərbaycanın suverenliyini təmin etməsindən narahatdır. Bu baxımdan da əli dinc insanların qanına batmış canilərə haqq qazandıran ABŞ onların törətdikləri cinayətlərə də bir növ şərik olur”, - deyə A.Badamov əlavə edib.
Bu gün Azərbaycan dövlətinin siyasi və iqtisadi müstəqilliyini təmin etdiyini deyən deputat, həmçinin bildirib: “Ölkəmiz sülhsevər siyasətini davam etdirir və dost olmayan ölkələri də ədaləti dəstəkləməyə dəvət edir. Bununla yanaşı, öz gücünü artıran dövlətimiz onunla təzyiq dilində danışmağın mümkün olmayacağını da açıq şəkildə bildirir. Azərbaycan beynəlxalq təzyiqlərə qarşı dözümünü nümayiş etdirərək ev sahibliyi etdiyi beynəlxalq tədbirləri də yüksək səviyyədə keçirəcək. Amma ölkəmiz suverenliyinə yenidən təhdid yaranacağı təqdirdə bunun qarşısının alınması üçün nə lazımdırsa, edə bilmək iradəsini də nümayiş etdirir”.
Bölmənin digər xəbərləri
