ABŞ-da “Apple” saatının iki modelinin satışına qoyulan qadağa bərpa edilib
Bakı, 18 yanvar, AZƏRTAC
Vaşinqtonun Apellyasiya Məhkəməsi “Apple Inc” və “Masimo” kompaniyaları arasında davam edən patent mübahisəsinə görə “Apple Watch Series 9” və “Apple Watch Ultra 2” smart saatlarının ABŞ-da satışına qoyulan qadağanı bərpa etmək qərarına gəlib.
AZƏRTAC Associated Press agentliyinə istinadla xəbər verir ki, ABŞ-ın ticarət nümayəndəsi Ketrin Tay dekabr ayının sonlarında Beynəlxalq Ticarət Komissiyasının (ITC) qərarını təsdiqləyib. O, “Apple” kompaniyasının qanda oksigen səviyyəsini ölçən cihazın istehsalında “Masimo”nun patentini pozduğunu müəyyən edib. “Apple Watch” saatında da oxşar funksiya var.
“Apple” kompaniyası məsələ ilə bağlı apellyasiya şikayəti verib və prosesin ən az bir il çəkəcəyi gözlənilir. Beləliklə, “Apple” 2024-cü il üçün saatların satışını dayandırmalı və ya ITC-nin qərarını nəzərə alaraq onları yenidən hazırlamalı olacaq.
Həftənin əvvəlində kompaniya “Watch Series 9” və “Watch Ultra 2” saatlarından qanda oksigen səviyyəsini təyin edən sensoru çıxarmağa hazır olduğunu bildirib.
Qeyd edək ki, ötən maliyyə ilində smart saatların satışı kompaniyaya 19,6 milyard dollar qazanc gətirib.
Bölmənin digər xəbərləri
