ABŞ-da koronavirusa yoluxma halları sutkalıq rekordu yeniləyib
Bakı, 27 iyun, AZƏRTAC
Birləşmiş Ştatlarda son sutka ərzində COVID-19 infeksiyasına rekord sayda - 47 min 341 yoluxma halı qeydə alınıb.
AZƏRTAC pandemiyanın statistikasını aparan Worldometer saytına istinadla xəbər verir ki, həmçinin ötən sutka ərzində ölkədə 663 nəfər koronavirus səbəbindən həyatını itirib.
Saytın Bakı vaxtı ilə bu gün saat 12:30-a olan məlumatına əsasən, ABŞ-da 2 milyon 553 mindən çox insan virusa yoluxub, 127 min 640 xəstə vəfat edib, 1 milyon 68 min 768 nəfər COVID-19 xəstəliyindən sağalıb. Hazırda müalicəsi davam edən 1 milyon 356 min 660 xəstədən 15 min 765 nəfərin vəziyyəti ağır qiymətləndirilir.
Xatırladaq ki, Çin hökuməti 2019-cu il dekabrın 31-də Hubey əyalətinin Uxan şəhərində naməlum pnevmoniyanın yayılmağa başladığı barədə Ümumdünya Səhiyyə Təşkilatını məlumatlandırıb. Mütəxəssislər xəstəliyə yeni koronavirusun səbəb olduğunu müəyyən edib və sonradan həmin xəstəlik rəsmən COVID-19 adlandırılıb. Martın 11-də Ümumdünya Səhiyyə Təşkilatı yeni koronavirus infeksiyasının yayılmasını pandemiya elan edib.
Bölmənin digər xəbərləri
