ABŞ İNSAN ALVERİNƏ QARŞI MÜBARİZƏDƏ AZƏRBAYCANA KÖMƏK GÖSTƏRƏCƏKDİR
Bu fikir daxili işlər naziri, general-polkovnik Ramil Usubovun dekabrın 2-də ABŞ-ın ölkəmizdəki səfiri Rino Harniş ilə görüşündə bildirilmişdir.
Nazirliyin mətbuat xidmətindən AZƏRTAC-a demişlər ki, görüşdə amerikalı diplomata başa çatmaqda olan 2004-cü ildə cinayətkarlıqla mübarizənin vəziyyəti, əməliyyat şəraitinin tam nəzarət altında olması barədə məlumat verilmişdir. Nazir vurğulamışdır ki, coğrafi mövqeyinə görə Azərbaycan Avropa ilə Asiyanı birləşdirən əlverişli nöqtədə, TRASEKA və Şimal-Cənub əsas magistral dəhlizini əhatə edən ərazidə yerləşdiyindən beynəlxalq, transmilli mütəşəkkil cinayətkar birləşmələrin diqqətini cəlb edir. Ona görə də bütün bəşəriyyət üçün son dərəcə təhlükəli olan belə cinayət növlərinin qarşısının alınmasında beynəlxalq təşkilatların yaxından köməyinə və dəstəyinə ehtiyac duyulur.
İnsan alverinə qarşı mübarizə məsələsinə toxunan general-polkovnik Ramil Usubov bu cinayətin bütün dünyanı narahat edən beynəlxalq terrorçuluq, narkotiklərin və silahların qanunsuz dövriyyəsi kimi təhlükəli cinayət növləri ilə bir sırada durduğunu, onun qarşısının yalnız beynəlxalq birliyin birgə səyləri nəticəsində alınmasının mümkünlüyünü vurğulamışdır.
Nazir xatırlatmışdır ki, Azərbaycan 1996-cı ildə BMT-nin “Köləliyin ləğv edilməsi haqqında”, “İnsan alveri və fahişəliyin üçüncü şəxslər tərəfindən istismarı ilə mübarizə haqqında” konvensiyalarına, 2003-cü ilin mayında isə “Transmilli mütəşəkkil cinayətkarlıqla mübarizə haqqında” Konvensiyaya və onun protokollarına (Palermo protokolları) qoşulmaqla bu cinayətlə mübarizədə qəti mövqedə olmasını bir daha sübut etmişdir. Eyni zamanda Azərbaycan Respublikasının Prezidenti 2004-cü il mayın 6-da “Azərbaycan Respublikasında insan alverinə qarşı mübarizə üzrə Milli Fəaliyyət Planı”na dair Sərəncam imzalamışdır. Həmin Sərəncamın icrasını təmin etmək üçün daxili işlər nazirinin müavini, polis general-leytenantı Zahid Dünyamalıyev insan alverinə qarşı mübarizə üzrə Milli Fəaliyyət Planının həyata keçirilməsi üçün milli əlaqələndirici təyin olunmuş, DİN-in Mütəşəkkil Cinayətkarlıqla Mübarizə Baş İdarəsinin tərkibində İnsan Alverinə Qarşı Mübarizə İdarəsi yaradılmışdır.
Nazir bildirmişdir ki, ötən müddətdə idarə tərəfindən insan alveri ilə bağlı 33 cinayət faktı aşkar edilmiş, 48 nəfər cinayət məsuliyyətinə cəlb olunmuş, insan alverinin 150 qurbanı aidiyyatı üzrə sağlamlıq mərkəzlərinə göndərilmişdir.
O da qeyd olunmuşdur ki, Daxili İşlər Nazirliyində ATƏT, Avropa Şurası, Beynəlxalq Miqrasiya Təşkilatı və digər beynəlxalq qurumların, həmçinin ABŞ və Fransa ekspertlərinin iştirakilə bu məsələyə həsr olunmuş çoxsaylı görüşlər keçirilmiş, qabaqcıl təcrübənin öyrənilməsi, şəxsi heyətin bu sahədə peşəkarlığının artırılması və digər məsələlər müzakirə edilmişdir.
Səfir Rino Harniş səmimi görüşə və ətraflı məlumata görə minnətdarlığını bildirərək, insan alverinə qarşı aparılan mübarizəni müsbət qiymətləndirmiş, bu növ cinayətlərə qarşı mübarizədə beynəlxalq təşkilatların, o cümlədən ABŞ səfirliyinin Azərbaycana kömək göstərəcəklərini söyləmişdir.
Görüşdə tərəfləri maraqlandıran bir sıra digər məsələlər də müzakirə olunmuşdur.
Bölmənin digər xəbərləri
