ABŞ Ticarət Nazirliyinin CLDP proqramının və Patent İdarəsinin nümayəndələri Əqli Mülkiyyət Agentliyində olublar
Bakı, 14 aprel, AZƏRTAC
Əqli Mülkiyyət Agentliyində ABŞ Ticarət Nazirliyinin Kommersiya Hüququnun İnkişafı Proqramının (CLDP), ABŞ Patent və Əmtəə Nişanları İdarəsinin nümayəndələri ilə görüş keçirilib.
Agentlikdən AZƏRTAC-a bildirilib ki, görüşdə İdarə Heyətinin sədri Kamran İmanov ölkəmizdə əqli mülkiyyət sahəsində aparılan islahatlar barədə ətraflı məlumat verib. Qeyd edib ki, Azərbaycan Prezidentinin 2018-ci il 20 aprel tarixli Sərəncamına uyğun olaraq Müəllif Hüquqları Agentliyinin və həmin Sərəncamla ləğv edilmiş Standarlaşdırma, Metrologiya və Patent üzrə Dövlət Komitəsinin tabeliyindəki Patent və Əmtəə Nişanları Mərkəzinin birləşmə formasında yenidən təşkili yolu ilə Əqli Mülkiyyət Agentliyi yaradılıb.
Qonaqlara, həmçinin MDB məkanında ilk dəfə Azərbaycanda əsərlərin könüllü qeydiyyat sisteminin tətbiq edildiyi, patentlərə və əmtəə nişanlarına əlçatanlığı asanlaşdıran 24/7 rejimində fəaliyyət göstərən Patent və Əmtəə Nişanlarına Açıq Hədəf (PƏNAH) elektron sisteminin, patentlər və qeydiyyatdan keçirilmiş əmtəə nişanlarına dair məlumatların toplanıldığı “Açıq reyestrlər”in yaradılması, habelə sənaye mülkiyyəti obyektlərinin ekspertiza müddətlərinin azaldıldığı barədə ətraflı məlumat verilib. Qeyd edilib ki, Azərbaycandan olan iddiaçılara ixtira və sənaye nümunələri üçün PƏNAH vasitəsilə Avrasiya iddia sənədlərini elektron qaydada və birbaşa olaraq Avrasiya Patent İdarəsinə təqdim etmək imkanı yaradılıb.
Diqqətə çatdırılıb ki, “Patent haqqında” Qanuna bir sıra dəyişikliklər edilib və bu, patentlərə əlçatanlığı daha da asanlaşdıracaq. İxtiralara, faydalı modellərə və sənaye nümunələrinə patentlərin alınması prosedurları sadələşdirilib, iddia sənədlərinin ekspertizasının sürətləndirilməsinin təmin edilməsi və keyfiyyətinin artırılması məqsədilə bir sıra yeni müddəalar əlavə edilib.
CLDP rəhbəri – baş hüquq məsləhətçisi Steve Qardner Azərbaycanda əqli mülkiyyətin inkişafı sahəsində görülən işlərdən məmnun qaldığını bildirib. O, əqli mülkiyyətin kommersiyalaşdırılması və innovasiya, əqli mülkiyyət (ƏM) hüquqlarının icrası və saxtakarlıqla mübarizə və ƏM üzrə təhsil və peşəkar hazırlıq proqramları sahəsində ABŞ təcrübəsindən Azərbaycanda da faydalanmağın mümkünlüyünə toxunaraq, bu sahələrdə əməkdaşlığın faydalı ola biləcəyini söyləyib. CLDP rəhbəri qeyd edib ki, Agentlik ÜƏMT ilə əməkdaşlıqda ƏM-in qorunmasına sadiq qalır.
ABŞ Patent və Əmtəə Nişanları İdarəsinin hüquq məsləhətçisi Ken Misbin patent və əmtəə nişanlarının qeydiyyatı və qorunma mexanizmləri barədə onu maraqlandıran suallar verib və Azərbaycan təcrübəsini maraqla izlədiyini bildirib.
ABŞ Ticarət Nazirliyinin Ticarət Hüququnun İnkişafı Proqramının beynəlxalq proqram mütəxəssisi xanım Aleksa Blak CLDP tərəfindən Bakıda keçiriləcək Mərkəzi Asiya üzrə əqli mülkiyyət sahəsində Ən Yaxşı Təcrübələr üzrə Regional Seminar və işçi qrupun iclası barədə ətraflı məlumat verib. Belə ki, burada CLDP tərəfindən Mərkəzi Asiyanın 5 ölkəsi və Azərbaycanın dövlət qurumlarının nümayəndələrinin iştirakı ilə, xüsusilə coğrafi göstəricilər sahəsinə diqqət yetirməklə, sərhədlərarası əqli mülkiyyət məsələlərinin müzakirəsi məqsədilə regional işçi qrup təşkil ediləcək. İşçi qrup çərçivəsində, həmçinin milli coğrafi göstərici sistemləri nəzərdən keçiriləcək, mümkün qanunvericilik dəyişiklikləri araşdırılacaq və regiondan tranzit keçən saxta məhsullarla mübarizə istiqamətində gömrük orqanlarının fəaliyyəti ilə bağlı məlumatlar dinləniləcək. Sessiyanın sonunda razılaşdırılmış fəaliyyət planı, dövlət qurumlarının öz təşkilatlarına təqdim edə biləcəyi tövsiyələr və CLDP tərəfindən hazırlanmış Saxtakarlığa Qarşı Mübarizə üzrə Təlimat Kitabçasına ümumi baxış təqdim ediləcək.
Bölmənin digər xəbərləri
