Ağ Evin rəsmi saytında Xocalı faciəsini pisləməyə çağıran petisiyanın yerləşdirilməsi müsbət haldır
Bakı, 22 fevral (AZƏRTAC). Ağ evin rəsmi saytında Xocalı faciəsini pisləməyə çağıran petisiyanın yerləşdirilməsi müsbət haldır.
AZƏRTAC xəbər verir ki, bu sözləri fevralın 22-də Prezident Administrasiyasının ictimai-siyasi məsələlər şöbəsinin müdiri Əli Həsənov demişdir.
İnsanlardan gələn bu istəklərin həyata keçirilməsinin normal hal olduğunu qeyd edən Ə.Həsənov əlavə etmişdir ki, Xocalı soyqırımına aid Ağ Evə ünvanlanmış bu tələblər nəzərə alınacaqdır.
Prezident Administrasiyasının şöbə müdiri demişdir ki, ermənilərin Xocalıda törətdikləri vəhşiliklərin dünya ictimaiyyətinə çatdırılması, faciə qurbanlarının xatirəsinin yad edilməsi bu cür hadisələrin gələcəkdə təkrarlanmasının qarşısını alacaqdır.
Xocalı soyqırımının Kolumbiya, Meksika, Pakistan, Çexiya dövlətləri, həmçinin ABŞ-ın 6 ştatı tərəfindən tanındığını, Rumıniya və digər ölkələrdə müzakirədə olduğunu qeyd edən Ə.Həsənov Türkiyə hökumətinin və Türkiyə Böyük Millət Məclisinin də yaxın gələcəkdə bu faciəyə müvafiq qiymət verəcəyinə ümid etdiyini bildirmişdir. Türkiyə parlamentində bu məsələ ilə bağlı bir neçə dəfə dinləmələr keçirilmiş və bələdiyyələr səviyyəsində qiymət verilmişdir.
Bakının azadlığı uğrunda mübarizə aparmış türk şəhidlərinin xatirəsinə Azərbaycan hakimiyyəti tərəfindən yüksək ehtiram göstərildiyini deyən Ə.Həsənov onlara Şəhidlər xiyabanında və ölkənin digər bölgələrində abidələrin qoyulduğunu qeyd etmişdir.
Bölmənin digər xəbərləri
