Ağcabədidə 20 Yanvar faciəsi qurbanlarının xatirəsi yad edilmişdir
Ağcabədi, 20 yanvar (AZƏRTAC). 20 Yanvar faciəsinin 21-ci ildönümü Ağcabədi rayonunda geniş qeyd olunmuşdur.
Rayonun idarə və təşkilatlarında, təhsil və mədəniyyət müəssisələrində faciənin ildönümünə həsr olunmuş yığıncaq və konfranslar keçirilmiş, foto və pəsm sərgiləri açılmış, yanvarın 19-da ümumtəhsil məktəblərində dərslər Qanlı Yanvar hadisələrinə həsr olunmuşdur.
Yanvarın 20-də rayon rəhbərliyi, ağsaqqallar, gənclər, ziyalılar, əmək kollektivlərinin nümayəndələri şəhidlər xiyabanına gələrək Vətənimizin müstəqilliyi və ərazi bütövlüyü uğrunda həlak olanların məzarları üstünə və 20 Yanvar qurbanlarının xatirəsinə ucaldılmış abidə kompleksi önünə çiçək dəstələri düzmüşlər. Şəhidlərin ruhuna dualar oxunmuşdur.
Tədbir Qarabağ Muğam Mərkəzində davam etdirilmişdir. Rayon İcra Hakimiyyətinin başçısı Şahin Məmmədov Azərbaycan tarixinin azadlıq mübarizəsinin və qəhrəmanlıq salnaməsinin parlaq səhifələrindən olan 20 Yanvar faciəsindən danışmış, qanlı hadisəyə siyasi-hüquqi qiymət verilməsində, şəhidlərin adının əbədiləşdirilməsində ümummilli lider Heydər Əliyevin xidmətlərini yüksək qiymətləndirmişdir.
Tədbirdə rayon mədəniyyət və turizm şöbəsinin hazırladığı ədəbi-bədii kompozisiya nümayiş etdirilmişdir.
Bölmənin digər xəbərləri
