Ağdam-Xankəndi yolunun açılmamasının təşkilatçısı məhz BQXK-dır - ŞƏRH
Bakı, 10 sentyabr, AZƏRTAC
Qarabağda fəaliyyət göstərən qondarma qurumun rəhbərliyi dəyişdi və hətta bu gün təntənəli şəkildə “andiçmə mərasimi” təşkil olundu. Elə təəssürat yarandı ki, Araik Arutunyandan fərqli olaraq Samvel Şahramanyan baş verən proseslərə məntiqli yanaşacaq və reinteqrasiya proseslərini başlamağa cəhd edəcək. Lakin erməni xisləti S.Şahramanyanda da təcəlli edərək Azərbaycana qarşı bəyanatların səslənməsi və bu gün “inauqurasiya” keçirilməsi ilə müsbət nəticələrə olan ümidləri birdəfəlik yox etdi. Yerli ermənilər və onlara dəstək verən Beynəlxalq Qırmızı Xaç Komitəsinin (BQXK) ofisi humanitar fəlakət şousunun təkcə Azərbaycana deyil, həmçinin Rusiya Federasiyasına qarşı olduğunu bir daha öz əməlləri ilə sübut etdi.
Bu sözləri AZƏRTAC-a açıqlamasında politoloq Amid Əliyev söyləyib.
Onun sözlərinə görə, Rusiyadan Qarabağda yaşayan ermənilər üçün məhz Azərbaycanın təklif etdiyi yol ilə gələn humanitar yardım maşını artıq 2 gündür Bərdədə gözləyir. Ərazidə təhlükəsizliyi təmin edən Rusiya sülhməramlı qüvvələri mövcud olduğu təqdirdə belə bir hadisənin baş verməsi anlaşılmır, həm də qəbuledilməzdir. Qeyd olunanlar fonunda Qərbin direktivlərini canla-başla yerinə yetirən BQXK-nın canfəşanlığı ortaya çıxır. Ümumiyyətlə, bu təşkilatın fəaliyyətinin istər Birinci Qarabağ müharibəsində, istərsə də 44 günlük Vətən müharibəsində çox şübhəli və ermənipərəst olması artıq heç kimdə şübhə yaratmır. Bu, açıq-aşkar Qarabağda casusluq və kəşfiyyat-pozuculuq fəaliyyəti kimi qiymətləndirilə bilər.
"Əslində 4000 nəfərə yaxın itkin düşmüş azərbaycanlının taleyi ilə maraqlanmayan, humanitar yardım işini bərbad hala salan, əsirlərin dəyişdirilməsini biznesə çevirən və sonda Laçın yolu ilə əraziyə kontrabanda keçirən BQXK-dan bu addım gözlənilən idi. Qərbin bir sıra siyasi dairələrindən maliyyə yardımları alan bu təşkilat bölgədə sülhün əldə olunmasını tamamilə əngəlləməyə və reallığa uyğun olmayan aclıq şousunu yaratmağa çalışır. Həmçinin reinteqrasiya prosesinə maneə olmağa xidmət edir. Ağdam- Xankəndi yolunun açılmaması və bölgədəki uydurulmuş "blokada şousu"nun təşkilatçısı məhz BQXK-dır. İkinci Qarabağ müharibəsində ermənilərə kəşfiyyat və əməliyyat məlumatlarını ötürən belə bir təşkilatın məramı təbii ki, humanistlik yox, ziddiyyət yaratmaq, konfrantasiyanı pik həddə çatdırmaq və ərazidə yaşayan erməniləri özlərinin çirkin oyunlarının alətinə çevirməkdir.
Əgər Azərbaycandan gələn humanitar yükün əraziyə buraxılmamasının kökündə iki xalq arasında illərlə formalaşan əks münasibətlər durursa, Rusiyadan gələn yardımın əraziyə daxil ola bilməməsində isə Qərb imperializminin siyasi ambisiyaları və Rusiyanın ərazidən çıxarılması iddiası dayanır. Yüklərin əraziyə buraxılması bütövlükdə bölgədə "blokada", "humanitar fəlakət" və "aclıq" kimi terminləri özündə cəmləşdirən şounun tamamilə oyun olmasını ortaya qoyacaq. Eyni zamanda, ermənilərin onsuz da itirilmiş etibarı bir daha darmadağın olacaq. Məhz ona görə BQXK və ona təlimat verənlər bunun baş verməməsimə çalışırlar", - deyə A.Əliyev bildirib.
O əlavə edib ki, Azərbaycanın bu istiqamətdə mövqeyi daha aydın və demokratikdir. Ərazidəki qondarma qurum özünü buraxmalı, silahlı ermənilər ərazini tərk etməli, yüklər ancaq Azərbaycan tərəfindən təmin edilməli və reinteqrasiya prosesi başlamalıdır. Bunları yerinə yetirilməsi isə birbaşa Ermənistan siyasi hakimiyyətinin üzərinə düşən funksiyadır. Bu gün separatçıları hər cür dəstəkləyən Ermənistan siyasi hakimiyyəti bununla bir daha sülhə hazır olmadığını bəyan edir. Belə olan halda isə Azərbaycan dövləti yenidən "Ermənistanı sülhə məcburetmə mexanizm"indən istifadə edəcək. Əgər Ermənistan eyni ritorikanı davam etdirərsə, bu proses olduqca yaxındır. Bunu ermənilər nə qədər tez başa düşsələr, bir o qədər faydalarına olar.
Bölmənin digər xəbərləri
