Ağstafada şəhid və qazi övladları üçün Yeni il şənlikləri keçirilib
Ağstafa, 24 dekabr, Ruslan Novruzoğlu, AZƏRTAC
Ağstafada şəhid və qazi övladları, fiziki qüsurlu və aztəminatlı ailələrdən olan uşaqlar üçün Yeni il şənlikləri keçirilib. Bayram tədbirləri Ağstafa Rayon İcra Hakimiyyəti, Azərbaycan Həmkarlar İttifaqı Konfederasiyası və Azərbaycan Təhsil İşçiləri Azad Həmkarlar İttifaqı tərəfindən birgə təşkil olunub.
AZƏRTAC-ın bölgə müxbiri xəbər verir ki Ağstafa şəhərində yerləşən ictimai-mədəni istirahət məkanlardan birində şəhid övladları ilə görüş keçirilib. Görüşdə Ağstafa Rayon İcra Hakimiyyətinin başçısı Seymur Orucov şəhidlərimizin ailə üzvlərini, qazilərimizi qarşıdan gələn 31 Dekabr – Dünya Azərbaycanlılarının Həmrəyliyi Günü və Yeni il bayramı münasibətilə təbrik edərək qeyd edib ki, Prezident, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun şücaəti, şəhidlərimizin qəhrəmanlığı sayəsində Vətənimiz suverenliyinə qovuşdu. Bu müqəddəs yolda şəhadətə qovuşan şəhidlərimizin Vətən sevgisi, xalqımıza bəxş etdikləri qürur və iftixar hissləri əbədi olaraq qəlblərdə alovlanacaq. Vətənimizi, torpaqlarımızı azad edərkən şəhid olan igid oğullarımızın bizə əmanət etdikləri övladları və hər bir ailə üzvü qüdrətli dövlətimiz tərəfindən hər zaman yüksək diqqət və qayğı ilə əhatə olunur.
Sonra Şaxta baba uşaqlara bayram hədiyyələri verib.
Daha sonra Ağstafa rayon Heydər Əliyev Mərkəzində Bakı Bələdiyyə Teatrı tərəfindən təqdim olunan rəngarəng Yeni il şənliyində Şaxta baba və Qar qız, uşaqların sevimli nağıl qəhrəmanlarının personajlarının iştirakı ilə müxtəlif əyləncəli proqramlar nümayiş etdirilib.
Bölmənin digər xəbərləri
