Aİ-nin müşahidə missiyası Qərbin maraqlarına xidmət edir – RƏY
Bakı, 30 yanvar, AZƏRTAC
Son zamanlar Cənubi Qafqazda baş verən proseslər fonunda Avropa İttifaqının Ermənistandakı müşahidə missiyasının fəaliyyətinin daha iki il uzadılması bölgədə maraq, eyni zamanda, narahatlıq doğurub. Rəsmi Bakı dəfələrlə bəyan edib ki, bu missiyanın fəaliyyəti regionun təhlükəsizliyinə təhdid yaradır və Azərbaycanın maraqlarına uyğun deyil. Bununla yanaşı, son dövrlərdə missiyanın tərkibi və fəaliyyəti ilə bağlı yeni detallar, fəaliyyətinin genişlənməsi müşahidə edilir ki, bu da məsələnin əsas mahiyyətini daha da aktuallaşdırır.
Bu sözləri AZƏRTAC-a açıqlamasında politoloq İlqar Vəlizadə söyləyib.
O qeyd edib ki, Avropa İttifaqının müşahidə missiyasının fəaliyyətinin uzadılması Azərbaycanın haqlı narahatlığına səbəb olur. Azərbaycan tərəfi dəfələrlə həm Avropa İttifaqına, həm də Ermənistana bu missiyanın regionun təhlükəsizliyinə təhdid yaratdığını çatdırıb. Ancaq buna baxmayaraq, missiyanın nümayəndələri Ermənistanla Azərbaycan arasında müvəqqəti şərti sərhəddə təxribat xarakterli səfərlər edərək, regionda hərbi-siyasi sabitliyi təhdid altında saxlamağa çalışır.
“Qeyd etmək lazımdır ki, Avropa İttifaqının bu missiyası Ermənistan üçün münasib bir alətə çevrilib. Təəssüf, missiyanın fəaliyyətinin uzadılması ilə bağlı müxtəlif mənbələrdən daxil olan məlumatlar göstərir ki, bu fəaliyyətin tərkibində hərbi-texniki sursatların təchizatı məsələsi də var. Bu da missiyanın funksional baxımdan transformasiyaya uğradığını göstərir. Belə bir vəziyyət bir sıra suallar və müəmmalar yaradır. Missiya artıq hərbiləşmiş struktura çevrilir və daimi əsaslarla Ermənistan-Azərbaycan sərhədində fəaliyyət göstərir ki, bu da regionda sülhə olan ümidləri sarsıdır”, - deyə İ.Vəlizadə vurğulayıb.
Politoloq qeyd edib ki, son dövrlərdə xüsusilə Fransanın sözügedən missiyada fəal iştirakı nəinki Azərbaycanda, regionun digər ölkələrində də Qərbin siyasi maraqlarına xidmət etdiyi düşüncəsini formalaşdırır.
“Missiyanın tərkibində kifayət qədər çox Fransa nümayəndəsinin olması və bu ölkə rəsmilərinin missiyanın fəaliyyətinə yaxından maraq göstərməsi, hətta regiona səfərlər edərək missiya üzvləri ilə görüşlər keçirmələri bunu sübuta yetirir. Məhz bu kimi məqamlar missiyanın bitərəfliyini şübhə altına alır və onun konkret siyasi maraqlara xidmət etdiyini göstərir. Belə bir vəziyyət regionda sabitliyə deyil, əksinə, əlavə gərginliyə səbəb ola bilər”, - deyə o diqqətə çatdırıb.
İ.Vəlizadə xatırladıb ki, Avropa İttifaqının nümayəndələri tez-tez guya Azərbaycanın Ermənistanı təhdid etdiyini və yalnız bu missiyanın fəaliyyətinin İrəvanı bu təhdidlərdən sığortaladığını bildirirlər. Qeyd edirlər ki, guya bu missiya regionda sülhün bərqərar olmasında vacib rol oynayır və sabitliyin yaradılmasına kömək edir. Ancaq göründüyü kimi, belə yanaşma həqiqəti qətiyyən əks etdirmir və region üçün əlavə təhdid törədir.
“Azərbaycan tərəfi tələb edir ki, bu missiya regiondan çıxarılsın və Ermənistanla Azərbaycan arasında aparılan delimitasiya-demarkasiya işlərinə mane olmasın. Hətta hər iki tərəf bu məsələdə vasitəçilərə ehtiyac olmadığını qəbul edib. Missiyanın bu həssas məqamda regionda fəaliyyəti onun prosesə müdaxilə edə biləcəyini göstərir ki, bu da növbəti təhlükələrə yol açır. Bu, isə regiona heç bir halda lazım deyil”, – deyə politoloq vurğulayıb.
Bölmənin digər xəbərləri
