“AirBaltic” Aİ-yə daxil olmayan ölkələrə uçuşları bərpa edir
Riqa, 16 mart, AZƏRTAC
Latviyanın “AirBaltic” aviaşirkəti zəruri ehtiyacları olan sərnişinlər üçün martın 17-dən etibarən Riqa-Kiyev marşrutu üzrə uçuşları bərpa etmək niyyətindədir.
AZƏRTAC xəbər verir ki, bu barədə məlumatı aviaşirkət yayıb. Bildirilir ki, bu ayının sonunda Avropa İttifaqı xaricində digər marşrutların açılması da nəzərdə tutulur.
Aviaşirkət martın 28-dən Riqadan Tbilisi, Təl-Əviv, Moskva, Sankt-Peterburq və Minsk istiqamətlərində uçuşları bərpa etməyi planlaşdırır. Yay uçuş cədvəlinə əsasən, Tallindən Amsterdam, Berlin, Brüssel, Kopenhagen, London, Malaqa, Oslo, Paris, Stokholm, Vyana və Vilnüs istiqamətində birbaşa uçuşların həyata keçirilməsi gözlənilir.
Qeyd edək ki, ötən həftə Latviya hökuməti üçüncü ölkələrlə hava əlaqələrinin martın 17-dən etibarən bərpa olunması barədə qərar verib. Bununla yanaşı, üçüncü ölkələrdən Latviyaya təcili olmayan uçuşlara qoyulmuş qadağa hələlik qüvvədədir.
Asiman Əsədov
AZƏRTAC-ın xüsusi müxbiri
Riqa
Bölmənin digər xəbərləri
