AKADEMİK AVARÇƏKƏNLƏRİMİZİN DÜNYA ÇEMPİONATINDAKI İLK RƏQİBLƏRİ MÜƏYYƏNLƏŞDİ
Bakı, 5 avqust (AZƏRTAC). Fransanın Briv-la-Qayard şəhərində start götürən akademik avarçəkmə üzrə yeniyetmələr arasında dünya çempionatında Azərbaycanı təmsil edən Teymur Kutseba-Aleksandr Qlotov duetinin seçmə mərhələdəki rəqibləri müəyyənləşmişdir. Azərbaycan Milli Avarçəkmə Federasiyasından bildirmişlər ki, ikinəfərlik sükansız qayıqda yer alan 17 yaşlı avarçəkənlərimizin rəqibləri Ernestas Zarskis-Rolandas Maskinkas (Litva), Anis Tekuk - Lies Kasdi (Əlcəzair), Vu Min Park - Donq Jin Kim (Cənubi Koreya), Anibal Aravena Qarsiya-Luis Saumann Salas (Çili), Yasin Xan-Muneş Kumar (Hindistan) cütlükləri olacaqlar.
Reqlamentə əsasən, ilk 4 yeri tutacaq avarçəkənlər dörddəbir finala, sonrakı 2 iştirakçı isə təsəlliverici mərhələyə vəsiqə qazanacaq.
Qeyd edək ki, Kutseba-Qlotovun çıxış etdiyi kateqoriyada ümumilikdə 26 ölkə mübarizə aparır. Avqustun 8-də keçiriləcək finalda ilk 5-liyə düşəcək cütlüklər 2010-cu ildə Sinqapurda təşkil olunacaq Yeniyetmələrin I Yay Olimpiya Oyunlarına lisenziya qazanacaqlar.
Bölmənin digər xəbərləri
