AKKAN SUVER: DÜNYA AZƏRBAYCANLILARININ II QURULTAYI BÜTÜN TÜRK DÜNYASI ÜÇÜN ƏLAMƏTDAR HADİSƏ OLACAQDIR
AKKAN SUVER: DÜNYA AZƏRBAYCANLILARININ II QURULTAYI
BÜTÜN TÜRK DÜNYASI ÜÇÜN ƏLAMƏTDAR HADİSƏ OLACAQDIR
Qardaş Türkiyənin ictimaiyyəti dünya azərbaycanlılarının qarşıdakı II qurultayına böyük əhəmiyyət verir. AZƏRTAC-ın xüsusi müxbirinin qurultayda ən çoxsaylı nümayəndə heyəti ilə təmsil olunacaq Mərmərə Qrupu Strateji və Sosial Araşdırmalar Vəqfinin sədri Akkan Suverlə bu önəmli tədbirlə bağlı müsahibəsini oxuculara təqdim edirik.
- Akkan bəy, Dünya azərbaycanlılarının II qurultayına hansı hisslərlə gedirsiniz?
- Mərmərə Qrupu Vəqfi bu foruma çox böyük əhəmiyyət verir. Türkiyədən tədbirdə iştirak etmək üçün Bakıya gedəcək 41 nəfərlik heyətə qrupumuzun üzvləri ilə yanaşı, Ədalət və İnkişaf Partiyasından 4, Cümhuriyyət Xalq Partiyasından 1, Ana Vətən Partiyasından 1 millət vəkili, habelə ölkəmizin ziyalıları və ictimai-siyasi xadimləri daxildirlər. Qeyd etməliyəm ki, bu forum təkcə Azərbaycan və Türkiyə üçün deyil, bütün türk dünyasının mənafeyi baxımından çox mühüm hadisədir. Biz bu tədbirə qardaş Azərbaycanın gələcəyinə, xalqlarımızın tərəqqisi və birliyinə böyük inam hissi ilə gedirik.
- Siz dünyanın müxtəlif ölkələrində yaşayan azərbaycanlıların həmrəyliyinin əsasını qoymuş və bütün türk dünyasının birliyinə əvəzsiz töhfələr vermiş görkəmli siyasi xadim, Azərbaycan xalqının ümummilli lideri Heydər Əliyevin xidmətlərini həmişə yüksək qiymətləndirmisiniz.
- Haqlısınız. Mərhum Prezident Heydər Əliyev müstəqil, suveren Azərbaycanı beynəlxalq aləmdə tanıdan böyük şəxsiyyətdir. O, Azərbaycanı düşdüyü ağır böhran və parçalanmadan xilas etməklə yanaşı, öz sevgisi ilə bütün azərbaycanlıları qardaşlaşdırmağa nail olmuş bir liderdir. Azərbaycanlı təfəkkürünü erməni lobbisinə qarşı qoymağa müvəffəq olan Heydər Əliyev, ATƏT-in tarixi Lissabon sammitində onlara qarşı çox mühüm bir qələbəyə imza ataraq, qardaş Azərbaycan xalqının haqlı olduğunu bütün dünyaya sübut etdi. Dünyaya səpələnmiş azərbaycanlılar məhz onun səyləri sayəsində birlik nümayiş etdirməyə nail oldular. Heydər Əliyev olmasaydı, bu gün Qafqazda sabitlik və tərəqqi nümunəsinə çevrilən Azərbaycan da olmazdı. Dünyanın müxtəlif ölkələrindən 1200 insanın Bakıya - indiki foruma toplaşması da Heydər Əliyevin xidmətidir. Sevindirici haldır ki, onun nurlu ideyaları bu gün Prezident İlham Əliyev tərəfindən layiqincə davam etdirilir.
- Sizcə, Azərbaycan və Türkiyə, habelə diasporlarımız beynəlxalq aləmdə əməkdaşlıq çərçivəsində hansı məsələlər üzrə fəaliyyətlərini daha da gücləndirməlidirlər?
- İlk olaraq, biz erməni fitnəsinə qarşı və Azərbaycanın ərazi bütövlüyünün tezliklə bərpa olunması üçün daha fəal iş aparmalıyıq. Əlamətdar haldır ki, Türkiyədə iqtidarlı müxalifətli bütün ictimaiyyət Azərbaycanın mənafelərinə zidd heç bir addım atılmasına yol vermir. Qardaş xalqa dəstəyimiz hər zaman davam edəcəkdir.
İkinci mühüm istiqamət Türkiyənin qondarma “erməni soyqırımı”nda ittiham edilməsinə qarşı ölkələrimizin və diasporlarımızın birgə iş aparmasıdır. Bu məsələdə bizim Azərbaycanın dəstəyinə ehtiyacımız vardır.
Qeyd etməliyəm ki, hörmətli Prezidentimiz İlham Əliyev dahi şəxsiyyət Heydər Əliyevin “bir millət, iki dövlət” kəlamına daha geniş anlam gətirdi. Azərbaycanın dövlət başçısının və xalqının Şimali Kipr türklərinə dəstəyi Türkiyədə çox yüksək qiymətləndirilmiş və böyük rəğbətlə qarşılanmışdı. Biz, habelə Azərbaycanı öz vətəni hesab edən türkiyəli iş adamlarına göstərilən qayğıya və yaradılan şəraitə görə də hörmətli Prezidentə minnətdarlığımızı bildiririk.
Dünya azərbaycanlılarının II qurultayı kimi mühüm tədbirdə iştirak edəcəyimdən duyduğum qürur hissini ifadə edərək, tədbirin bir daha təşkilatçılarına – Azərbaycan dövlətinə, Xarici Ölkələrdə Yaşayan Azərbaycanlılarla İş üzrə Dövlət Komitəsinə dərin təşəkkürümü bildirirəm.
Bölmənin digər xəbərləri
