“ALEKSANDR DÜMA QAFQAZDA” LAYİHƏSİNİN TƏQDİMATI OLMUŞDUR
AZƏRTAC xəbər verir ki, mədəniyyət və turizm nazirinin müavini Sevda Məmmədəliyeva mərasimi açaraq, layihənin müəllifləri qarşısında qoyulan məqsəd və vəzifələrdən danışmışdır. Onun sözlərinə görə, layihə Avropanın qabaqcıl dövlətlətindən biri olan Fransanın fəal iştirakı və dəstəyi ilə Azərbaycan, Gürcüstan və Rusiyada mədəni turizmin inkişafına yönəldilmişdir.
Layihənin yaranmasına görkəmli fransız yazıçısının Qafqaza səfəri və onun yazdığı memuarlar səbəb olmuşdur. Müəlliflərin fikrincə, Aleksandr Düma “cığırı” xalqlarımızın mədəniyyətlərinin qarşılıqlı surətdə zənginləşməsi məsələlərində köməkçi olacaqdır. Layihədən başlıca məqsəd mədəni-tarixi əlaqələrin dirçəldilməsi, regional səviyyədə və Avropa miqyasında ikitərəfli və çoxtərəfli əməkdaşlığın möhkəmləndirilməsidir. Layihənin mahiyyəti Avropa mədəni turizminin siyasi məqsədyönlülüyü, iqtisadi əsaslandırmanı və mədəni dialoqu özündə birləşdirən fəlsəfəsidir.
Azərbaycan Prezidenti İlham Əliyevin tapşırığı ilə yaxın vaxtlarda Şəki, Zaqatala və Balakənin memarlıq abidələri bərpa olunacaqdır.
Təqdimat mərasimində Avropa Şurasının, Gürcüstan İqtisadi İnkişaf Nazirliyinin, Dağıstan Mədəniyyət və Turizm Nazirliyinin, Rusiyanın Azərbaycandakı səfirliyinin nümayəndələri iştirak etmişlər.
Bölmənin digər xəbərləri
