Müdafiə naziri, general-polkovnik Səfər Əbiyev Silahlı Qüvvələrin Ali baş komandanı, Prezident İlham Əliyevə raport verdi:

-Cənab Ali baş komandan, qoşunlar döyüş tapşırığını yerinə yetirirlər.

Ali baş komandan səngərləri gəzdi, əsgərlərin hərbi hazırlıq vəziyyətini yoxladı.

Sonra Ali baş komandan hərbi xidmətdə fərqlənən bir qrup əsgəri orden və medallarla təltif etdi, onları qiymətli hədiyyələrlə mükafatlandırdı.

Daha sonra Prezident İLHAM ƏLİYEV əsgərlərlə çay süfrəsi arxasında söhbət etdi:

-Mən sizi mükafatlarla təltif etdim, sizi təbrik edirəm. Siz düşmənlə üz-üzə, ön mövqedə yaxşı xidmət edirsiniz. Azərbaycanın ərazi bütövlüyü uğrunda öz xidmətlərinizi göstərirsiniz. Azərbaycan Ordusu son illər ərzində həm peşəkarlıq, həm də maddi-texniki bazasının möhkəmlənməsi baxımından böyük dərəcədə güclənmişdir. Biz bundan sonra da ordu quruculuğuna böyük diqqət göstərəcəyik, hər an hazır olmalıyıq ki, öz doğma torpaqlarımızı işğalçılardan azad edək. Vaxtilə Füzulu rayonunun işğal altına düşməsi nəticəsində bütün əhali rayonu tərk etməyə məcbur olmuşdur. Ancaq 1990-cı illərin əvvəllərində yaşanan o böhran artıq ulu öndər Heydər Əliyevin Azərbaycana rəhbərliyə gəlişindən sonra, onun səyləri nəticəsində həll olunandan sonra, müharibədə də dönüş yaranmışdı və bizim ordumuz 1993-cü ilin sonunda Füzuli rayonunun böyük bir hissəsini işğalçılardan azad etmişdir. O cümlədən bu bölgəni, Horadiz qəsəbəsini, - indi biz Horadizə şəhər statusu vermişik, - bunun nəticəsində əhalinin əksəriyyəti bu gün rayonda məskunlaşmışdır. Yeni qəsəbələr salınır, yeni evlər tikilir. Yəni bu onu göstərir ki, Azərbaycan Ordusu öz doğma torpaqlarını işğalçılardan azad etməyə qadirdir və biz 1993-cü ilin sonunda bunu etmişik. Amma ondan sonra atəşkəs sazişi bağlandı və müharibənin birinci mərhələsi başa çatmışdır. Amma müharibə qurtarmayıbdır. Biz müharibə şəraitində yaşayırıq və belə olan halda, ilk növbədə, ordu potensialımızı gücləndirməliyik. Bizim dövlət xərclərimizdə hərbi xərclər birinci yerdədir və bütün başqa sahələrə ayırdığımız xərcləri böyük dərəcədə üstələyir. Ölkəmiz qarşısında böyük işlər dayanır - iqtisadi, sosial məsələlər, insanların həyat səviyyəsinin yaxşılaşdırılması, qaçqınların və məcburi köçkünlərin yeni qəsəbələrə köçürülməsi - bütün bunları biz edirik.

Ancaq ən başlıca vəzifə bizim hərbi potensialımızı, ordu potensialımızı, müdafiə potensialımızı gücləndirməkdir. Bəli, bu, böyük vəsait, böyük maddi imkanlar tələb edir. Amma biz bunu edirik. Bu yaxınlarda Ermənistan tərəfi bəyan etmişdir ki, Azərbaycan neft pullarını silah alınmasına xərcləyir, silahlanma aparır. Birincisi, biz öz pulumuzu xərcləyirik. Burada həm neftdən, həm də qeyri-neft sektorunun inkişafından əldə olunan gəlirlər var. Ermənistandan fərqli olaraq, biz son dörd il ərzində dövlət xərclərimizi on dəfə artırmışıq, müdafiə xərclərimizi on dəfə artırmışıq və bu yaxınlarda yenə də onları artıracağıq. İkincisi, Ermənistan rəhbərliyi getsin, öz qəpik-quruşunu saysın. Hər halda, Ermənistandan fərqli olaraq, biz heç kimin forpostu deyilik. Biz öz vəsaitimizi xərcləyirik və haraya, necə xərcləyirik, bu, bizim öz işimizdir. Biz müstəqil dövlətik, Ermənistandan fərqli olaraq, sərhədlərimizi də xarici sərhəd qoşunları yox, öz əsgərlərimiz qoruyur. Onlardan fərqli olaraq bizim iqtisadi və sənaye potensialımız da öz əlimizdədir. Ermənistandan fərqli olaraq, biz dünyanı gəzib-dolaşmırıq ki, kimsə bizə kömək etsin. İki ölkə arasında prinsipial fərq bundan ibarətdir.

Siz birinci sıradasınız, ön mövqelərdəsiniz, düşmənlə üz-üzəsiniz. İlk növbədə, doğma Vətənimizin təhlükəsizliyi, ərazi bütövlüyümüzün bərpası məsələləridir. Bizim gənclərimiz vətənpərvərlik ruhunda tərbiyə alırlar və belə də olmalıdır. Arzu edirəm ki, bundan sonra da siz xidmətdə həmişə fərqlənəsiniz, böyük dövlət mükafatlarına layiq olasınız və Vətən uğrunda fəal xidmətlər göstərəsiniz.

SƏFƏR ƏBİYEV: Cənab Ali baş komandan, məruzə edirəm ki, Sizin qayğınız sayəsində Azərbaycan Ordusu inkişaf edir. Siz bu gün gördünüz ki, Azərbaycan Ordusunda çox böyük ruh yüksəkliyi var və qısa müddətdə, Sizin əmriniz olan kimi, işğal altındakı torpaqları azad etməyə qadirdir.

Əsgərlərimizin döyüş qabiliyyətinin yüksək olduğunu deyən müdafiə naziri Azərbaycan Ordusunun əsgər və zabitlərinin peşəkarlığının günü-gündən artdığını bildirdi. Buna misal olaraq, bu yaxınlarda Kosovoda sülhməramlı missiyalarını başa çatdıran hərbçilərimizin nümunəvi xidmətlərinin xarici ölkələrin hərbi mütəxəssisləri tərəfindən də yüksək qiymətləndirildiyini vurğuladı. Azərbaycan Ordusunun 90 illik yubileyinin olacağını xatırladan nazir Ali baş komandan, Prezident İlham Əliyevin göstərişi ilə yubileyə ciddi hazırlıq işlərinin görüldüyünü də bildirərək dedi: Bu yaxınlarda Azərbaycan Ordusunun 90 illiyi olacaq və Sizin göstərişinizlə biz hərbi parad keçirməyə hazırlaşırıq. Bu, Sizin Azərbaycan Ordusuna göstərdiyiniz böyük qayğının daha bir təzahürüdür. Buna görə Sizə minnətdarıq.

İLHAM ƏLİYEV: Sağ olun. Bu il biz ordumuzun yaranmasının 90-cı ildönümünü qeyd edəcəyik. Mən göstəriş vermişəm ki, bu yubiley Azərbaycanda çox geniş qeyd olunsun və əlbəttə ki, bu tədbirlər içərisində əsas hadisə hərbi parad olacaqdır. Bu barədə mən bir müddət bundan əvvəl Müdafiə Nazirliyinə göstəriş vermişəm və onlar indi hazırlıq işləri aparırlar. Uzun illərdir ki, Azərbaycanda hərbi paradlar keçirilmir. Düzdür, hər il biz Milli Ordumuzun yaranma günü ərəfəsində Heydər Əliyev adına Ali Hərbi Məktəbdə hərbçilərlə görüşürük və bu günü, tarixi günümüzü qeyd edirik və o tədbirlər zamanı son illər ərzində aldığımız hərbi texnikanın bir hissəsi - hərbi təyyarələr, vertolyotlar nümayiş etdirilir. Siz də yəqin ki, televiziya ilə bunları görmüsünüz. Ancaq mən hesab edirəm ki, bu dəfə biz ölkəmizin ən böyük meydanında - Azadlıq meydanında hərbi parad keçirəcəyik. Həm öz qüdrətimizi, hərbi gücümüzü göstərək, həm də bütün Azərbaycan xalqı bunu görsün, bizim dostlarımız buna sevinsin, düşmənlərimiz də başa düşsünlər ki, Azərbaycan bölgədə ən güclü orduya malik olan ölkədir. Burada bütün cəhətlərdən - həm peşəkarlıq baxımından, həm də texnika baxımından ən güclü hərbi potensial bizdədir, ən güclü ordu bizdədir. Mən əminəm ki, paradın keçirilməsi və ümumiyyətlə, Azərbaycanda, Azərbaycan cəmiyyətində orduya, hərbçilərə, əsgərlərə, zabitlərə qayğının, hörmətin artması sayəsində biz həm vətənpərvərlik ruhunda tərbiyə olunan gənclərimizi düzgün yola yönəltmiş oluruq, həm də ki, bütövlükdə ölkəmizi gücləndiririk. Hər bir ölkənin uğurlu, hərtərəfli inkişafı üçün onun ordu potensialı başlıca rol oynayır. Elə ölkə yoxdur ki, inkişaf etmiş ölkə sayılsın, ancaq zəif ordusu olsun. Mümkün deyil. Eyni zamanda, kasıb ölkədə heç vaxt güclü ordu ola bilməz. Bax, ona görə biz öz iqtisadi gücümüzü artırırıq - iqtisadi islahatlar, böyük quruculuq-abadlıq işləri, sosial məsələlərin həlli, insanların rifah halının yaxşılaşması. Eyni zamanda, bundan daha da vacib olan ordu quruculuğu məsələlərinə diqqət göstəririk və göstərəcəyik. Siz bilirsiniz ki, mən dəfələrlə bu məsələlərlə bağlı müşavirələr keçirmişəm, hərbçilərlə görüşmüşəm, bütün ön mövqelərdə olmuşam - həm Tərtər istiqamətində, Ağdam istiqamətində, bu gün də Füzuli rayonunun ərazisində. Mən özüm şəxsən bütün bu işlərə nəzarət edirəm və tam qətiyyətlə deyə bilərəm ki, bu gün Azərbaycan Ordusu öz doğma torpaqlarını hərbi yolla azad etməyə qadirdir. Biz sadəcə, hələ ki, ümid edirik ki, məsələ sülh yolu ilə həll oluna bilər. Düzdür, ümidlər getdikcə azalır, ancaq hələ ki, tam azalmayıbdır. Bununla bərabər, baxmayaraq ki, bu vaxta qədər çox böyük hərbi potensial yaratmışıq, ancaq onu daha da gücləndirməliyik. Bu yaxınlarda mən Nazirlər Kabinetinin iclasında hökumət qarşısında vəzifə qoymuşam ki, builki dövlət büdcəsinə əlavələr edilsin və hərbi xərclər 1 milyard 300 milyon dollardan, təxminən 2 milyard dollara qaldırılsın. Bu isə Ermənistanın bütün dövlət xərclərinə bərabərdir. Mən bu vəzifəni bir neçə il bundan əvvəl qarşıya qoymuşam və demişəm ki, Azərbaycanın hərbi xərcləri Ermənistanın bütün dövlət büdcəsinə bərabər olmalıdır. Bu gün biz bunu təmin edirik.

Sizə isə mən bundan sonra da Vətən uğrunda xidmətdə uğurlar arzulayıram. Şərəfli işdir, həm əsgərlər və gizirlər, həm də zabitlər üçün bundan şərəfli iş ola bilməz. Bir daha demək istəyirəm ki, arzu edirəm, siz bundan daha böyük mükafatlara layiq olasınız və baxmayaraq ki, gələcəkdə hansı sahələrdə çalışacaqsınız, öz işinizlə Azərbaycanın inkişafına töhfənizi verəsiniz.

Sağ olun.