ALİMLƏR AVTOMOBİLİN ƏN TƏHLÜKƏLİ RƏNGİNİ MÜƏYYƏN ETMİŞLƏR

29.06.2004 [11:54]
Çap et
A⁺ A^-

AZƏRTAC-ın xarici informasiya agentliklərindən aldığı xəbərə görə, Britaniya alimləri yol qəzaları ilə bağlı statistikanı öyrənərək belə nəticəyə gəlmişlər ki, qara avtomobillər digərlərindən daha çox qəzaya uğrayır. Böyük Britaniyanın “Çörçill” sığorta fondunun mütəxəssisləri 130 qəza hadisəsini təhlil etmişlər.

Məlum olmuşdur ki, qara rəngli avtomobillər qəza vəziyyətlərinin yaranmasında daha çox təqsirlidir. İkinci yeri gümüşü rəngli maşınlar tutur. Açıq sarı və ya krem rəngli avtomobillər isə ən təhlükəsiz maşınlardır.

Mütəxəssislər iddia edirlər ki, rəngin problemə heç bir dəxli yoxdur. Demə, məsələ bu rəngi seçən sürücülərin xasiyyətlərindədir. Psixoloqların fikrincə, qara rəngə üstünlük verən adamlar davakar, münaqişəyə meylli və bədrəftar olurlar. Gümüşü rəng həvəskarları soyuqqanlı və təkəbbürlüdürlər. Açıq sarı rəngə meylli adamlar isə, adətən, təmkinlidir və hisslərini cilovlamağı bacarırlar.

Psixoloq Donna Doson deyir: “Rəngin emosional təsiri avtomobilin idarə olunmasında da özünü göstərir”.