Alman nəşrində “Əsəd bəy Bakıda – Kosmopolit qaçqın” adlı məqalə dərc olunub
Vyana, 28 dekabr, AZƏRTAC
Almaniyanın “Frankfurter Rundschau” nəşrində “Əsəd bəy Bakıda - Kosmopolit qaçqın” adlı məqalə dərc olunub.
AZƏRTAC xəbər verir ki, məqalənin müəllifi Qurban Səid təxəllüsü ilə tanınan Əsəd bəyin xatirəsinə həsr olunmuş tədbirdə iştirak üçün yollandığı Bakı və səfər etdiyi şəhərətrafı yerlər, onların yaratdığı ab-hava barədə oxuculara məlumat verir. Yanardağa baş çəkən müəllif burada turizm üçün yaradılmış şəraitdən bəhs edir, eləcə də atəşpərəstlik və neft sənayesi barədə məlumat verir. Qeyd edilir ki, hələ 1878-ci ildə Nobel qardaşları neft tankerlərindən birinə “Zərdüşt” adı vermiş və Bakıdan Avropaya kerosin nəql edirdilər. Həmin dövrdə dünya üzrə neftin yarısı Bakıda çıxarılırdı və bu ilin iyul ayında Bakıya səfər edən Avropa İttifaqının rəsmisi Ursula Fon der Lyayen də Azərbaycanı etibarlı enerji təminatçısı kimi dəyərləndirmişdi.
Daha sonra müəllif Bakı bulvarı, İçərişəhər və şəhərin digər turistik yerləri barəsində qeydlərini oxuculara təqdim edir, orta əsrlərə aid qala divarları, neoklassik üslubda binalar və müasir göydələnlərin yaratdığı mənzərəni ətraflı təsvir edir. Eyni zamanda, şəhərdə çoxlu kitab mağazalarının olduğunu diqqətə çatdıran müəllif onların arasında “Əli və Nino” adlı kitab mağazasının da misal çəkir və azərbaycanlı Əli ilə gürcü Ninonun nakam məhəbbəti, dinlər və sivilizasiyalar arasında münasibətləri ön planda tutan kitab və onun yazarından söz açır. Höte İnstitutunun yerli tərəfdaşlarla birgə təşkil etdiyi və ədəbi cameədə Qurban Səid təxəllüsü ilə tanınan Əsəd bəyə həsr olunmuş “Məşəqqəti-həyat” sərgisinə gəlib çıxan məqalə müəllifi 1905-ci ildə Bakıda doğulmuş Lev Nissembaumun həyat tarixçəsini anladır. Sonralar Almaniyada müsəlmanlığı qəbul edən və müxtəlif təxəllüslər altında əsərlər yaradan yazıçının ən tanınan romanı “Əli və Nino” ilə yanaşı, dövrün və tarixin tanınmış şəxsiyyətlərinə həsr olunmuş bioqrafik əsərlər yazıldığı da vurğulanır. Sərgidə Əsəd bəyin yaradıcılığına müharibə, qaçış və mühacirətin təsirləri, onun əsərlərində nəyin həqiqət, nəyin xatirə, nəyinsə uydurma olduğuna məhz bu kontekstdən nəzər salındığı diqqətə çatdırılır.
Əsəd bəyin yaradıcılığında xüsusi yer tutan həqiqət və uydurmaların bir-birinə qarışdığı “Şərqdə neft və qan” adlı tarixi-publisistik romanından ilhamlanaraq yaradılan rəsm əsərləri seyrçi kimi məqalə müəllifinin marağını xüsusilə özünə cəlb edib. Məqalədə həmin sərgidə digər müəlliflərin əsərləri barədə də geniş məlumat verilir.
Bölmənin digər xəbərləri
